Cu asombro di un banda, pero sinembargo di spera pe otro, Gobierno a tuma nota di e posicion di conflicto tuma pa AHATA. Esaki tur den relacion cu e decision di Gobierno pa regula traves di un ley e crecemento di cantidad di cambernan all inclusive, cu segun tur rapport, incluyendo e ultimo di Banco Central, ta un segmento di e bishitante cu ta laga menos placa atras durante nan bishita na Aruba.
E actitud ultimo di AHATA, unda a dirigi un carta na gobierno, un dia prome cu tratamento di e ley den parlamento, no a cay den bon tera. Sigur si tuma nota di e forma con AHATA a bin ta ataca Gobierno den medionan di prensa, cu a conduci hasta na un punto unda kier a pone presion riba Gobierno por medio di retira nan tres miembro for di e hunto di supervision di ATA, sin te dia di awe a duna un motibo pa esaki.
Cu e carta di siman pasa diahuebs, AHATA ta insinua cu ATA lo por wordo miho maneha, si nan, AHATA haya 4 di e 7 miembronan, esta un mayoria, den e hunta di supervision.
Ta hopi straño cu durante 5 aña, un periodo den cual ambos e CEO, Jim Hepple y e Presidente di AHATA, esta Ewald Biemans, a fungi como miembro, nunca a cuestiona of trece proposicionnan dilanti manera menciona den e carta recien manda.
Al contrario durante tur e añanan aki, a supervisa ATA y un aña tras di otro a aproba presupuestonan, cuentanan anual como tambe tur bussiness plan di ATA.
Gobierno a keda masha desapunta den e forma di procede aki tuma pa AHATA, unda ta mustra mas cu e intencion di e asociacion di hotelnan ta pa purba para e tratamento di e ley cu lo mester regula e balansa den tipo di cambernan na Aruba.
Ta hopi cla pa tur hende cu esaki ta mas un acto di desesperacion di parti cierto miembro di AHATA, cu un oferta sincero. E proposicion aki unda ta ofrece gobierno un suma di 35 miyon, a cambio di haya un mayoria den e Hunta di Directiva y stop cu e ley, cual no por wordo mira otro cu un chantahe ariba gobierno.
E splicacion cu AHATA a pone den su carta na Gobierno siman pasa, no solamente ta hopi bruha y den un dicho crioyo, sin pia ni cabes, e ta mustra un vision riba maneho di turismo cu no ta data den e Siglo moderno aki.
Ta algo hopi serio ora cu cifranan ta papia asina positivo di turismo di nos pais desde e cambio fundamental den ATA y awor net un di e organisacionnan cu no solamente ta forma parti di e exito aki pero tambe ta gosa di e maneho di ATA, ta pretende cu e Minister di Turismo a bira mal Minister di anochi pa mainta.
No solamente e maneho di ATA a duna un empuhe grandi na promocion den exterior di nos isla, na mes momento entradanan produci pa ATA a wordo dirigi pa drecha e producto turistico di nos pais, manera tur hende por tuma nota den tur bario di nos isla.
No solamente e carta di AHATA ta carece di un vision adecuado pa turismo di nos pais, pero tambe e carta aki ta un mustra bon cla cu AHATA no sa nada mes con pa dirigi su mes na un Gobierno cu ta gosa di gran popularidad den pueblo y pa colmo cu tin un di e Ministernan mas popular y reconoci pa pueblo den su seno.
