Sindicato lo cuminsa lucha pa haya indexering; Hospital Horacio Oduber a firma CAO

Diamars pasa, gerencia di Hospital Dr. Horacio Oduber hunto cu sindicato ABV, mediador di gobierno, Banco di Sanger, Respaldo y FCLMA a firma un contract colectivo cu duracion di tres aña.

Di un negociacion cu a dura 20 luna cu retonan y diferente situacion cu a causa tardansa y cu tambe mester a warda pa presupuesto, Gina Maduro presidente di sindicato ABV a expresa cu nan ta hopi contento pa cera un CAO cu duracion di tres aña.

Den e protocol, Maduro a comenta cu tin diferente punto cardinal pa e clase trahado, unda cu tur trahado ta bay cu pasonan grandi pa dilanti. El a menciona por ehempel, cu pension semper den pasado tabata un problema grandi door cu e primanan tabata bou e dunado di trabou y sindicato.

Den ultimo añanan, Maduro a bisa cu nan a enfoca hopi pa pone 0.5% y cu e CAO aki cu lo drenta na vigor 1 di januari 2020; e dunado di trabou ta bay aumenta su parti di 9 pa 9.25%, cual e trahado ta bay aumenta di 2.50 pa 4 % y desde januari 2021, e 9.25 di doño di trabou lo bira 9.50 y na januari 2022 e lo yega te 10% y pa trahado lo yega te 5%.

Na 2021 nan lo yega na un total di 15% ekivalente cu IMSAN, ta algo cu Maduro a splica cu pa varios aña nan a pidi esey pa e trahadonan di hospital, Respaldo, Banco di Sanger y FCLMA, y ta un adelanto grandi pa loke ta trata pension.

Otro punto, por ehempel ta e bonus di december,cu tabata 780 y entrante aña aki na december lo tin un aumento di 900 florin, pa 2020 e ta bira di 900 pa 1000 florin y pa 2021 e ta bay di 900 garantisa pa 1.100 florin.

Ademas di esey, tocante begrafenis verzekering pa haya un seguro cu ta cubri nan gastonan di entiero, ora e persona ta bay cu pension desde aña aki, e por hiba begrafenis verzekering pa por aregla su entiero cu su pension.

Un di e puntonan mas importante, Maduro a menciona, ta AO verzekering, cual conforme CAO, e prome aña e persona por keda na cas cu un pago di 100% y di dos aña ta 80%, di tres aña ta 70%; pero e mester tin mas di 10 aña den servicio y lo haya 70% di salario basico te cu yega na edad di pension. E doño di trabou ta cubri dos tercera parti y e trahado e tercera parti.

Maduro a bisa cu esaki ta un beneficio hopi importante, pa motibo cu awor e trahadonan tin cu traha mas largo, te 65 aña di edad.

Riba tema di indexering, el a declara cu manera ta conoci, varios sindicato ta luchando cu e tema aki y nan ta representa ambtenaar. ABV ta e unico sindicato cu ta sector priva 100%, y p’esey nan no tin ni un miembro ambtenaar. El a aclara cu esey no ta nifica cu nan no ta bay lucha pa indexering. Ta existi un inflacion di 4.1% y loke ABV a palabra cu e director di SABA, IMSAN, hospital, FCLMA y director di Respaldo, ta cu e di dos siman di januari, e partidonan ta bay na mesa pa cuminsa negocia pa indexering pa nan tur.