Corte Electoral di Uruguay no a nombra ningun ganado di e di dos buelta di eleccionnan presidencial pa via di e resultadonan ahusta, cu ta duna cu 98,86% di e votonan conta, 1.155.000 voto pa Luis Lacalle Pou y 1.125.000 voto pa Daniel Martinez.
Apenas 30.000 voto di diferencia, of loke ta igual, poco mas di un punto porcentual di e total. Hamas den historia di Uruguay a produci un resultado asina y e decision historico di e Hunta ta bin pa motibo cu tin un number mayor di voto den observacion cu e diferencia di votacion cu ta separa e dos candidato.
Segun e mesun Hunta a informa, e resultadonan final lo conoce ‘diahuebs of diabierna’ di otro siman, unabes cu lo conoce e signo di e mas di 34.000 voto den observacion y di e porcentahe chikito cu ainda ta keda pa conta. E Partido Nacional di Luis Lacalle Pou te awor tin e bentaha, cu pa prome biaha den 15 aña, a supera cu voto Frente Amplio.
E sorpresa di diadomingo pasa tabata e progreso di Frente Amplio di Martinez. Ningun encuesta a duna e resultado aki y algun di nan tabata duna un bentaha pa e partido derechista di Lacalle cu mas di cinco punto. Ora e votacion a finalisa, algun di e prome encuestanan a cuminsa desmenti e hecho aki y nan tabata apunta pa empate tecnico, algo cu a sosode.
Luis Lacalle Pou a pidi pa Martinez reconoce su derota, pero e margen estrecho entre e dos candidato a haci cu Daniel Martinez a sali dilanti di su siguidonan y a pidi pa ‘respeta, cu prudencia, e resultado cu ainda tin cu sali’.
Di su parti, Lacalle a pronostica un historico momento ‘cu lo cuminsa cu e constitucion di un Gobierno multicolor den cual lo participa cinco partido cu te awor tabata den oposicion y cu lo trata di goberna Uruguay’.
