Cacho grandi ta ataca otro cacho na cura priva

Diasabra mainta a tuma nota di un caso di un cacho cu a bula for di cura pa cana rond den area di Santa Cruz. E cacho grandi aki a drenta den otro cura priva y ataca un chihuahua chikito. El a ranca e chihuahua for di parti abou di heki y mat’e di un forma cruel.

Famia di e chihuahua a keda sorprendi pa mira con un cacho a ranca e cacho for di nan heki, cu ta completamente cera, anto mata e cacho chikito indefenso di un forma cruel. E doño di e chihuahua a bisa cu no por a haci nada pasobra e cos a pasa den seconde y no por a kere con e otro cacho a ranca for di parti di abou, cu ta cera. Mirando cu e chihuahua ta chikito, e cacho grandi a logra lastr’e y cuminsa mord’e.

Angela, kende ta cabes di e cas, ta bisa pa tur esunnan cu tin cacho grandi por fabor tene cuenta cu nan cacho. “Awe mainta na mi cura di cas cera completamente cu heki, mi tabata trahando den mi cura cu mi chihuahua (indefenso), anto un cacho grandi di un bisiña (cu no ta biba ni cerca di nos cas) a acerca na nos cura y ranca for di e parti di abou di e heki nos chihuahua y mat’e di un forma cruel.”

E ta remarca cu hende ta grita awendia cu nan ta pro bestia, pa cuida nan, pero cu mester tene na cuenta pa educa bestia. Pa nan no sali for di nan mesun cura y ataca bestia di otro hende y mas na un cura cu no ta di nan.

Angela ta expresa su dolor cu su famia a perde un di nan miembro di un forma cruel cu no por a consol’e. “Nos no por haya nos chihuahua bek. Por fabor, si di berdad boso stima bestia manera boso ta exclama. Educa nan pa e cosnan aki no bolbe pasa.”

Na prome luga e doño di e cacho grandi no kier a sali for di cas y a bisa cu no ta su cacho a haci’e. Sinembargo polis a bisa cu no por nenga mirando cu e cacho tabata full na sanger. Despues e doño a bisa cu lo tuma responsabilidad pa paga tur gasto y pa cualkier cos cu e famia mester.

E doño di e otro cacho ta bisa cu esey no ta prome biaha cu su cacho ta sali for di cura y haci su cosnan malo, el a yega di mata otro cacho. Sinembargo e doño no a tuma accion y pone su cacho drumi. Awo cu e caso aki a pasa, e homber a bisa cu lo pone e cacho drumi mirando cu ta afecta otro hende den bisindario.

A crea varios reaccion riba medionan social, caminda ta pidi pa hende por educa nan bestia, of tene bon cuenta pa nan no sali y ataca na cas di otro hende. Esey pa ley por trece consecuencia di pago. Tambe comentario cu ta bisa cu si un cacho haya e smaak di sanger e por sigui ataca otro bestia of den caso pio, muchanan.

Redaccion di Bon Dia Aruba ta recorda pueblo cu doño ta responsabel pa actonan di e cacho, ya cu ley di cacho ta exigi pa cacho ta cera den cura. Doño di cacho cu no cumpli cu ley por enfrenta un multa di hasta 10 mil florin, of bay cera pa un maximo di seis luna.