Fundacion Hende Muhe den Dificultad a comparti (en conexion cu dia di hende homber algun dia pasa) cu mas cliente masculino ta acerca nan fundacion cu diferente motibo.

Magaly Maduro, coordinador di e fundacion a bisa mas hende homber ta yega cerca nan pa motibo di maltrato, pero tambe nan ta acerca pasobra nan mes a yega di maltrata y nan kier busca un solucion pa por drecha e situacion cu nan ta aden. Cu esey nan ta mira un desaroyo positivo den comunidad. Sinembargo caso di maltrato, adiccion, falta di comunicacion, ta keda un problema. Segun Maduro, ta varios topico ta bin dilanti.

El a duna di conoce tambe cu un di e problemanan ‘basta grandi’ cu nan sa haya, ta cu homber no tin e posibilidad pa tin contacto cu nan yiu. Di nan parti como fundacion, nan ta na fabor pa e tata tin bon relacion cu su yiu(nan).

“Nos ta haya importante cu ora un señora bin cerca nos, e tata ta na altura cu e mucha(nan) ta sigur y cerca nos. Nan por haya un areglo cu departamento concerni, manera voogdijraad, pa asina sigui den contacto”, el a splica. Agregando cu esey ta importante pa e desaroyo di e mucha.

A puntra Maduro tocante e gravedad di caso di hende homber cu tambe ta pasa den situacion similar manera hende muhe. E ta bisa cu en realidad, ‘awendia (e casonan di maltrato ta reparti) 50-50, pasobra hende homber ta victima tambe’.

E ta continua splica cu como muhe ta haci uzo di otro arma, manera verbal, ‘nos ta fuerte pa insulta’. Tambe tin caso cu tin hende muhe ta fisicamente maltrata hende homber, pues ‘den tur caso mester scucha ambos banda di storia, cual ta importante’.

Pa locual ta trata edad, e grupo di hende homber cu ta acerca mas ta den nan 30 aña di edad, cu ta e generacion ‘cu ta haya mas facil pa busca ayudo’, no manera un generacion antes cu ta mas conservativo.

Maduro a amplia si cu te ainda nan tabatin 220 persona cu a yega nan fundacion pa e parti ambulante, cual ni 1% tabata hende homber. “E drempel pa yega e fundacion ta basta halto. Nos a haya 31 señora cu a haya shelter, hunto cu 57 mucha menor cu a haci uzo di shelter, pero hopi di e menor di edad ta mucha homber”, el a splica.

E ta enfatisa cu mester tene bon cuenta cu esey, pa motibo cu den un futuro e muchanan por bira violento of nan mes por bira victima di abuso. “Nos tin trabou pa haci”, pero ta remarca cu ta trahando duro riba esey.

E vision pa e fundacion ta cu mester busca un caminda pa e problema familiar, relacion di pareha. “Nos ta bezig pa busca un nomber pa ilustra e problema miho. No ta hende muhe so, sino algo di henter e famia, caminda nos por yuda tur esunnan envolvi. Pero enfoke ta keda hende muhe”, el a splica.

Fundacion Hende Muhe den Dificultad lo tin nan actividad cu lo cuminsa 25 di november te cu 10 di december, unda lo tin 16 dia di conscientisacion y lo tin nan congreso. “Principalmente pa cuerpo policial, pasobra nos sa cu nan ta prome cu ta yega den caso di violencia domestico. Nan mester herment cu por traha cune y haci e bon trabou desde prome momento”, Maduro a bisa.