Diahuebs ultimo a tuma luga un referendum na departamento di Mediador di Gobierno, solicita pa FTA, unda e sindicato aki no por a haya e cantidad di voto exigi pa representa e trahadonan di Alhambra Casino.

Presidente di FTA, Hubert Dirksz, a declara na Bon Dia Aruba cu di e 142 trahadonan cu por a vota, un total 70 trahado a haci uzo di e derecho aki pa vota pa FTA of ningun sindicato. Di nan, un total di 69 a vota na fabor di FTA y un (1) a vota contra. Den e caso aki ta conclui cu FTA no a gana e referendum aki pa 3 voto so pa logra e cantidad di voto di mita plus uno, exigi den e ley di referendum, cu tabata 72 voto.

E sindicalista a cualifica e hecho aki como un ‘oportunidad di e trahadonan benta afo.’ FTA ta spera cu den proximo ocasion -segun e ley di referendum mester ta aki 6 luna- nan mester evalua kico lo pasa. Pero absolutamente e decision aki ta depende di e trahadonan mes, ya cu ta den man di e trahado di Alhambra Casino pa dicidi cual sindicato nan ta scoge. Of si nan no kier sindicato mes pa sali na nan defensa, derechonan y progreso como trahado, el a bisa. Ya cu e ta un forma pa e trahadonan por logra e salarionan y condicion di trabou, etc.

A pesar cu FTA no a gana e referendum pa un margen chikito di voto, nan lo sigui papia cu e trahadonan cu a sali dilanti pa bin cu e referendum.

Mayoria riba papel.
El a bisa cu FTA mes a haci peticion na Mediador di Gobierno pa organisa e referendum. Nan ta consciente cu a pesar cu nan por tin un mayoria riba papel, pero ora di vota, nan no a logra e cantidad exigi – di e mita plus uno.

Como sindicato nan ta lamenta cu te ainda ta asina cu e trahado mester prueba dos biaha, no solamente na momento di yena formulario pa ta miembro, e mester mustra e mayoria. Pero despues e trahado tin cu bin un biaha mas den un referendum.

E ta haya cu na momento cu e trahadonan ta yena e formulario pa entrega na Mediador di Gobierno, ya caba nan tin e mayoria caba. Sinembargo pa diferente circunstancia y motibonan, durante e referendum di e trahadonan di Alhambra Casino ta bin resulta cu FTA no a haya e mayoria.

Causana.
Den e caso specifico di Alhambra Casino, presidente di FTA ta kere cu no ta tur hende ta opta pa sindicato, y tin hende cu ta scoge pa keda patras y laga otro pa bay dilanti pa vota. “Nos no sa precies kico ta e motibo, pero por ta pa situacionnan otro, manera auto por a daña, situacion di famia.” Pero tambe e por tin di haci cu e trahado a bay traha y termina na cierto ora, pero no a alcansa pa yega. E referendum a tuma luga entre 1or di merdia te cu 4or atardi.

E veterano sindicalista, Hubert Dirksz, ta kere cu ora di referendum mester tin un mayoria basta amplio cu a yena formulario pa bira miembro, ya cu bo sa e ora cu den caso cu un porcentahe cay afo, ainda bo ta keda cu mayoria. Pero analisando e referendum ultimo aki, e ta mira cu un grupo grandi a cay afo y nan no a logra e mayoria.

Den pasado y pa hopi aña, FTA tabatin presencia na Alhambra Casino, y actualmente e trahado ta cu sindicato STA.