Director di un centro di investigacion Spaño a bisa diaranson cu un telescop gigante, cu lo costa casi $1.4 biyon, ta un stap mas cerca di ser construi na Canary Islands den caso cu un consorcio internacional cancela su plan pa construi esaki na Hawaii.
Director di instituto di astrofisica di Canary Islands, Rafael Rebolo a bisa AP cu un permiso di construccion pa e telescop a ser otorga pa e pueblo di Puntagorda riba e isla La Palma.
“Segun legislacion Spaño, no tin mas permiso necesario”, el a bisa den un email.
E consorcio internacional tras di e construccion di e Thirty Meter Telescope (TMT) kier construi esaki riba e cumbre mas halto di Hawaii. Pero algun Hawaiiano nativo ta considera e cumbre Mauna Kea sagrado, y nan protesta a stop construccion di bay dilanti desde juli.
E isla Spaño di La Palma, cual ya caba tin cantidad di telescop poderoso na e observatorio Roque de los Muchachos, a ser scogi como backup pa e telescop na 2016.
Como persona encarga cu e sitio alternativo, Rebolo a bisa cu e ta den contacto regular cu e consorcio y ministerio di Ciencia di Spaña.
Rebolo ta optimista cu Spaña lo por ricibi e telescop na final. “Mi ta kere ta posibel. Islanan Canario ta ofrece un solucion hopi bon pa por construi TMT lihe y ta un proyecto exitoso pa ciencia vanguardista”, Rebolo a bisa.
Despues cu manifestantenan a pone un blokeo riba caminda pa acceso na Mauna Kea e berano aki, e consorcio a dicidi pa bay dilanti y pidi un permiso di construccion na Spaña, den caso cu e sitio Hawaiiano ta bira insostenibel.
E sitio di observatorio Spaño ya a pasa evaluacion di impacto ambiental.
E cumbre na Mauna Kea y La Palma ta considera entre e miho sitionan di mundo pa observacion di espacio profundo, danki na nan clima y condicionnan di aire perfecto.
E tamaño grandi di e spiel di e telescop ta nifica cu lo colecta mas luz, permitiendo e pa mira obhetonan hopi leu, manera strea y galaxia. Astronomonan tin speransa di mira den e partinan mas profundo di universo y examina e tempo inmediatamente despues di Big Bang.
