Centro di Actividad Rancho a bin cu e iniciativa di crea nan propio biblioteca como un instrumento di transformacion social, den un bario cu ta confronta su retonan riba e tereno aki. Un biblioteca cu a cuminsa humilde y cu a cuminsa crece danki na e generosidad di autornan local y donacionnan haci cu a aporta na dje.
Recientemente Presidente di Stichting Rancho, Clifford Rosa hunto cu miembronan di e directiva di e fundacion a ricibi dos autor, un Arubiano y un Colombiano, cu a bay entrega nan buki como un contribucion na e biblioteca di e Centro di Actividad Rancho. Ta trata di e autor Richard Dabian cu a entrega su obra ‘E Faro Multicolo’, y e autor Pedro Vargas kende a entrega su buki na Spaño, ‘Un Alcalde en Apuros’. Ambos autor a participa recientemente durante e Festival di Buki pa Mucha, organisa pa Biblioteca Nacional Aruba (BNA).
Rosa a splica na Bon Dia Aruba cu nan a crea e biblioteca aki pa asina henter comunidad, pero specialmente e comunidad di Rancho, lo por haci uzo di nan coleccion di bukinan den diferente idioma. El a bisa cu e dos bukinan aki ta un contribucion hopi importante pa e fundacion. E fundacion aki ta consciente cu pa nan drenta e comunidad aki no ta facil, pero como fundacion nan ta experimentando diferente forma pa wak con mas por yega principalmente cerca nos generacion nobo. Y nan biblioteca ta un di nan cu ta dunado resultado positivo.
Rosa ta haya cu e topiconan di ambos buki ta uno perfecto pa e fundacion. Rosa a bisa cu como fundacion cu ta preserva y promove cultura y historia di e bario di Rancho, nan tin hopi historia cu ta relata na E Faro. Te hasta e tin laso familiar, ya cu presidente di fundacion Rancho su yiu muhe ta descendiente di e famia Fingal, cu tabata cuidado di E Faro.
Di su banda, Dabian a bisa cu esaki ta e prome biaha cu e ta bishita e centro aki, y el a keda impresiona con nan a lanta nan propio biblioteca den un forma bon organisa. “Obranan cu lo por guia nos generacion nobo den un rumbo hopi bon,” el a bisa. E autor a agrega cu literatura ta e miho arma contra criminalidad.
Cultura y aspecto social.
Igualmente Rosa a laga sa cu e autor Vargas su obra ‘Un Alcalde en Apuros’ ta un obsekio valioso, ya cu nan tin un buki pa ofrece na e comunidad multi cultural cu tin den e bario aki. Tambe el a referi na e conexion cu nan ta trahando cu Colombia y e lasonan historico cu e bario aki tin cu e cultura Wayuu na La Guajira.
Vargas a expresa cu e echo aki ta un honor p’e. “Pa mi ta un honor y un satisfaccion masha grato cu mi por ofrece cu cariño y devocion e buki aki,” el a bisa.
Tambe el a probecha e ocasion special aki pa relata su experiencia tempo cu e tabata Alcalde di un pueblo chikito y humilde, unda ademas cu e tabata Alcalde, e mester a fungi como hues, trahado social y te hasta yuda dera morto, ya cu nan presupuesto tabata limita.
Tur su experiencia y anecdota como Alcalde e ta cont’e den e buki aki di un forma masha ameno. P’esey e titulo di e buki ‘Un Alcalde en Apuros’, ta un indicacion di tur loke el a pasa aden como Alcalde di un pueblo cerca di Bogota, Colombia.
E ta spera cu e buki aki por enrikece e biblioteca di e Centro di Actividad Rancho y pa e obra aki por sirbi como instrumento di cultura y transformacion social di e bario aki.
