E pagado di belasting no mag haya e cuenta pa salbacion di Girobank. Un bailout no ta necesario mes, segun ex presidente di Banco Central CBCS Emsley Tromp, kende 6 aña pasa tabata responsabel pa ehecuta e medida di emergencia pa Giro.

E ex presidente ta reacciona riba e publicacionnan cu a aparece siman pasa unda ta mustra cu gabinete Rhuggenaath a bay Den Haag pa entre otro delibera riba Corsou su sector bancario y financiero, y e posibel impacto cu e situacion aki tin riba e resto di e economia. Tromp a reacciona riba esaki den un articulo di opinion den Ingles titula “The Current Supervisory Practices of CBCS: A Way Forward”, den cual e no ta menciona Girobank directamente pero ta cla cu ta referiendo na e banco aki.

Pa salba e institucion financiero aki di un crisis di likidacion y eventualmente tambe sigur’e contra peliger den futuro, lo a opta pa exigi 450 miyon florin di e pagado di belasting di Corsou. Esaki lo ta necesario no solamente pa salba Girobank, si no tambe mirando e riesgonan sistematico cu esaki lo tin efecto pa henter e sistema financiero. Tromp ta haya esaki ‘mind boggling’, cu e actual presidente interino di CBCS Bob Traa, cua tabatin un bon carra na International Monetary Fund (IMF), lo por bin cu un proposicion asina cu ta bay contra e conseho cu IMF a duna Corsou.

E ex presidente ta señala cu den e caso aki tin dos cuestion di relevancia. Pa prome cu den e situacion di Corsou casi no por papia di actividadnan interbancario, pa cual e peliger cu problemanan na un banco lo por causa mas problema na otro ta ‘sumamente minusculo’. Na segundo luga, e bienes total den sector bancario ta encera 13 biyon florin, di cual Girobank tin un porcentahe relativamente chikito.

E dos factornan aki ta trece na luz e pregunta grandi si en berdad tin un riesgo grandi den caso cu e banco mester cera su porta y declara bancarota. E ex presidente ta cuestiona si e banco den e caso aki no ta ‘too big to fail’. Tromp ta contesta su propio pregunta: Mirando e falta di conexion y dependencia entre banconan y un concentracion di casi 90% na e banconan mas grandi na Corsou (MCB, RBC y BdC) na momentonan aki no tin niun banco pa cual lo mester un medida drastico.

Finalmente e ex presidente di Banco Central ta argumenta cu e posicion financiero y di debe di gobierno no ta uno faborabel. Pa via di e problema financiero di gobierno e supuesto solucion aki di salba Girobank por medio di un ‘bailout’ of nacionalisacion, Tromp ta di opinion cu lo crea un peso demasiado grandi riba un Corsou cu ya caba ta lidiando cu un debe nacional halto compara cu e producto nacional (BBP).