Aruban Warriors ta organisa un protesta contra hotel na Sero Colorado. Awe, dia 14 di november 2019, 5.30pm. Tur esunnan cu por yega n’e casita patras di Baby Beach lo ta bon bini.
“Trece bo borchi si por. Nos ta responsabel pa tur destruccion cu nos ta laga gobiernonan haci na nos pais. Y no ta paso segun gobierno acta a wordo firma nos mester entrega spada. Na Aruba no a keda mucho naturalesa virgen mas manera na Sero Colorado. Eynan nos por bay sinta relaha y reflexiona den tur trankilidad. Aruba ta di nos. Nos a hered’e fo’i nos antepasadonan Indjan Caquetio y nos mester cuid’e pa nos mes y pa tur esunnan cu ta sigui despues di nos”, e grupo ambientalista a bisa den un comunicado di prensa.
“Aparte di cu gobierno ta duna e grupo Martinon carte blanche pa destrui nos patrimonio, tin algo basta sospechoso cu e placa cu mester a wordo deposita na un banco nacional. Manera ta conoci, si bo kier sa origen di fondonan sospechoso bo mester ‘follow the money’. Ra ra ra ta unda e suma di 20 miyon dollar ta scondi anto?
Asina tin hopi pregunta mas relaciona cu e hotel Secrets cu ta planea na Sero Colorado. Nos ta contra pa destrui nos naturalesa unico pa un proyecto asina dudoso y cu si e bira realidad mes lo no genera trabou pa Arubiano sino pa cheap labor stranhero. Mas stranhero na Aruba kiermen menos trabou y luga di biba pa e Arubiano mes. Gobiernonan ta gusta papia cu e hotel lo bay genera trabou pa hende local pero no mester lubida cu: Tur Arubiano ta local, pero no ta tur local ta Arubiano.”
