Riba iniciativa di Hulanda e 4 paisnan den Reino lo conhuntamente hiba un investigacion integral y externo dilanti pa asina haya sa kico ta e problemanan y retonan cu studiantenan Caribense ta enfrenta ora di bay studia na Hulanda.
Un grupo di trabou lo ademas investiga e posibilidad di institui un fondo pa promove mobilidad pa studiantenan den Reino. E investigacion riba e problema di ‘sluit aan’ na e sistema Hulandes cu hopi studiante Caribense ta enfrenta, lo enfoca su mes riba studiantenan, docentenan, institutonan, tanto enseñansa anterior cu studiante a tuma y e carera academico futuro. “Tur pais ta comprometi di pone tur recursonan necesario pa esaki”, asina tabata para riba e lista di palabracion cu a traha ayera na e Vierlandenoverleg di enseñansa cu a tuma luga na Hulanda.
E grupo di trabou cu lo ocupa su mes cu investiga e estudio cu ta sigui na Hulanda lo trece nan proposicionnan na e proximo Vierlandenoverleg pa asina mehora e situacion cu studiantenan di enseñansa secundario na un di e 3 paisnan Caribense di Reino ta enfrenta.
Segun e palabracionnan, adicionalmente tur 3 pais Caribense den Reino a compromete nan mes pa promove educacion den nos mesun region, por medio di traha hunto mas y inclui ‘blended learning’ por medio di cursonan online di institutonan Hulandes. Durante e reunion studiantenan di tur pais di Reino cu ta studiando na Hulanda a duna presentacionnan. Minister di Enseñansa di Corsou Marilyn Alcala-Walle (PAR) a keda afecta pa e cantidad di obstaculo cu nan ta enfrenta na e pais Europeo: “Tin un bon preparacion. E studiantenan ta experiencia un ‘culture shock’. Nan ta experiencia heimwee y problemanan di salud mental. Nan ta sinti nan mes perdi. E clima ta hunga un rol. Hulanda no ta flexibel, y ta mantene su mes por ehempel strictamente riba ta na tempo. E studiantenan ta haya dificil lidia cu haya un bida social y nan ta sinti nan mes nan so. Pa colmo tin un falta di apoyo mientras nan tin un situacion financiero dificil pasobra nan no ta custumbra pa plania nan gastonan. Nan no por traha presupuesto pa nan mes”.
