Prome Minister, Evelyn Wever-Croes a indica cu Gobierno a pidi Fondo Monetario Internacional (IMF) pa valida e cifra di nos propio cuenta nacional. E validacion lo keda cla e luna aki of luna di december awor.
Igualmente el a bisa cu gobierno a pidi Fondo Monetario Internacional (IMF) duna nan conseho riba e tema di personal y situacion di nos leynan laboral pa empleado publico. Tambe gobierno a pidi IMF su conseho riba e forma cu gobierno ta compensa e ambtenaar y e cantidad di placa cu ta bay den aparato gubernamental.
Premier Wever-Croes a declara cu esaki no kier men cu gobierno ta bay kita hende masalmente. “Esey no ta bay ta e caso. IMF no ta bay bisa nos kico pa haci. Nan ta bay duna nos recomendacion,” el a aclaria. Aunke gobierno a priminti cu no lo bin cu retiro masal for di aparato gubernamental, pero si nan lo bay atende cu asunto di personal na un manera responsabel.
Gobierno a yega di pidi IMF nan ayudo riba nos sistema di belasting. El a aclaria cu esaki ta algo cu gobierno ta haciendo ariba su mes. Tampoco e sorto di consehonan aki no ta un cos cu mester di aprobacion di e Colegio di Supervision Financiero (CAft).
Actualmente gobierno a implementa shete instrumento pa baha gasto di personal, cu ta un aspecto cu CAft den su rapport ta bin remarca. Pero no tur ta bay mes lihe cu gobierno kier, y nan ta ampliando nan constantemente manera e VUT.
