Den un comunicado di gobierno, Minister di Infrastructura y Maneho Teritorial a reacciona pa comentarionan den medionan di comunicacion relaciona cu ley di Parke Marino.
Segun e comunicado, recientemente a tuma nota di diferente ‘mal informacion treci dilanti un bes mas a traves di medionan di comunicacion encuanto contenido di e ley di Parke Marino, carga pa partido AVP’. Caminda cu entre otro ta bisa cu den e ley ta prohibi piscamento for di baranca. Pa cual Minister Otmar Oduber ta enfatisa y aclaria cu esaki no ta berdad! “Den e ley na ningun momento ta prohibi piscadonan pa pisca for di baranca.”
E comunicado ta continua bisando cu locual cu si ta berdad di acuerdo cu locual cu Tuy Giel di Centro di Pesca Hadicurari, a trece dilanti cu Mike de Meza e tempo ey como e Minister encarga, a introduci un ley cu si a crea prohibicion riba un cantidad di especie di piscanan cu e piscadonan no ta di acuerdo cune. Giel a bisa tambe den e entrevista aki cu esaki tabata un ‘fastball’ cu Gobierno a pasa e piscadonan e tempo ey na momento di e prohibicion aki. Ademas Giel a menciona cu e ta para pa/ y ta kere den regulacion y den proteccion di especienan manera cocolishinan chikito, etc.
Importante pa menciona ta cu pa mas di mas di 30 aña a purba na introduci un Parke Marino, pa cual Gobierno a combersa cu diferente stakeholder durante e proceso, cu ta inclui principalmente e piscadonan. A scucha nan pensamentonan tocante proteccionnan cu mester tuma luga den bida marino rond di nos isla. Specialmente pa e areanan cu ta protegi dentro di e parke marino.
E meta di Parke Marino ta pa conhuntamente cu piscadonan, watersports, buceadonan y usuarionan di nos awanan, crea e proteccion necesario di especienan cu ta inclui nos coralnan, e comunicado ta finalisa.
