Gobierno ta hayando entrada cu a presupuesta Aworaki incumplimento di contribuyente ta na 30%

Departamento di Impuesto ta hayando e entrada cu gobierno a premira den su presupuesto 2019.

Directora di Departamento di Impuesto, Luenne Gomez- Pieters a declara na Bon Dia Aruba cu e departamento aki ta wak cu placa di impuesto ta drentando den caha di gobierno, manera nan a premira. Sinembargo nan mester keda pone bista riba incumplimento di e contribuyentenan.

Aworaki e incumplimento ta na 30%, pero e por ta miho, segun Gomez-Pieters. Nan deseo ta pa bah’e un poco mas, entre 20 pa 10% di incumplimento. E hecho cu un 80% di e clientenan ta cumpliendo cu nan compromiso di impuesto, ta un tarea grandi cu nan ta eherce como departamento di Impuesto, conhuntamente cu e contribuyentenan.

Gomez-Pieters a bisa cu incumplimento riba pago di impuesto tabata na 40% aña pasa (2018). Si nan por mira riba nan entrada total, 60% di e contribuyentenan a entrega nan declaracion di impuesto. Aworaki, mirando cu nan a implementa e prome fase di e proceso di digitalisacion y automatisacion y tambe cierto procesonan, esaki ta facilita pa nan por saca carta di cobransa cu boet, for di april aña, pasa pa esunnan cu no ta cumpli.

E ta algo cu ta causa dolor –segun Gomez Pieters– y te hasta e contribuyentenan ta protesta cu nan ta hayando cobransa cu boet, pasobra nan a cay un par di dia laat cu e pago di nan impuesto. Pero e ta bisa cu esaki ta parti di nan trabou como departamento pa sigura cu e cumplimento por sigui manera mester ta. E ta haya cu nos tur mester ta consciente di nos debernan fiscal.