Stichting voor Verstandelijk Gehandicapten Aruba lo celebra 55 aniversario cu actividad ‘feria di alegria’. Jose Puente di SVGA a elabora tocante con e fundacion a lanta pa esunnan cu deficiencia intelectual y ‘aprecio pa nan carga fuerte’.
Na aña 1964, un grupo di persona inkieto pa e situacion di hende cu capacidad special a bay di acuerdo pa lanta algo entre nan. Christina van den Berg- De Freitas hunto cu P. Harting y A. de Vries tabata e pionero riba e tereno.
Nan a mira e estado deplorabel cu persona tabata biba aden, sin ningun atencion, desaroyo y sin futuro. Riba dia 9 di december 1964, e grupo a cuminsa cu plan concreto. Christina a bira activo como vocero y presidente, pa eherce e cargo te cu aña 2012, momento den cual pa motibo di salud mester entrega su cargo.
Despues a mira cu e fundacion a conta cu varios departamento, un cas interino y a ofrece preparacion for di cuminsamento di forma scol ‘Dun’un Man’. Awo e fundacion a yega na 55 aña di existencia ta cuestion di trabou y desaroyo constante.
“Nos por mira cu e fundacion a keda crece den cantidad di persona, pero tambe den specialisacion, caminda nos por conta awe cu educacion fisico adapta na e poblacion general”, Puente a splica.
Nan tin atencion riba varios area di logopedia y psicologico cu ta yena e necesidad cu e fundacion tin y cliente merece. Nan kier sigui solicita pa busca y amplia vivienda pa haci e calidad di bida mas normal pa nan clientenan.
Tambe cu bista pa futuro pa un scol special, cu ta rekeri despues cu alumno caba cu nan ciclo di Dun’un Man. E plan ta pa sigui modernisa pa atende cu plan di desaroyo cu e grupo merece y logra un desaroyo den comunidad cu mester atencion debido.
“Pa e celebracion a solicita cu departamento organisa un actividad pa feria di alegria. Un deseo cu nos tin pa nos cliente y personal por participa y comunidad en general por atende y ta boluntario”, el a bisa.
Puente a splica e situacion awendia ta cu den pasado e situacion tabata critico. Sinembargo e situacion a keda mehora, pero poblacion ta keda aumenta. E parti di syndroom a keda afecta y aumenta dia pa dia.
Esey ta haci cu locual tabatin antes, awo a bira diferente. E ta splica cu mester sigui studia y renoba. Loke e tabata conoce 25 aña pasa, awo tin cu studia pa cera conoci cu syndroom nobo, manera un syndroom cu un cliente so tabatin.
“Pa full un fundacion di mas di 250 cliente anto yega un cu un syndroom diferente. Nos tur tin cu cera cabes y siña con pa trata pa conoce e persona ey. E ta algo pa sigui desaroya cu ta bay pasa cu nos, y mester sigui atende cu necesidad den futuro”, Puente a expresa.
E retonan ta cada dia mas cu tin cliente y mester espacio pa ampliacion. E necesidad ta continua y tur instancia di gobierno bin mester sigui atende cu . “E no ta bay caba, e no ta bay bira miho.”
Sinembargo mester confronta cu necesidad di persona cu tin incapacidad pa tende, habilidad mulitple, pa reconoce nan. Awendia no por atende cu cierto mucha pa motibo di acomodacion of edificio cu no a wordo lanta e tempo ey, cu caracteristica cu tabata mester pa e tempo ey. Pero cu desaroyo ta keda yena necesidad y realisa trabou den e posicion cu nan ta.
Actualmente nan fundacion tin 265 cliente cu ta atende, cu ta pertenece na diferente pasadia. Fuera di esey, Puente ta bisa cu ta keda esunnan cu no ta haya atencion of nan tin otro expectativa di e fundacion. Tambe tin limitacion presente pa purba di duna informacion, pero ta mira cu hende ta desea pa por tin mas cu esey.
E ta bisa cu nan ta di acuerdo y ta consciente cu nan por y kier mehora, pero mester ayudo economico y formacion y ta trahando riba esey.
