No por papia di un ‘takeover’ unilateral di sistema di ley y orden di St. Maarten na man di Den Haag, ya cu un decision asina mester ta a base di consenso. Sinembargo, tin Hulanda a cargo di ehecucion di cumplimento di ley pa un periodo limita lo ta beneficioso pa e sistema di husticia, e isla y su habitantenan, segun miembro di Tweede Kamer, Chris van Dam (CDA).

A pesar di reaccion fuerte di algun politico di St. Maarten, Van Dam ainda ta convenci cu el a haci lo corecto ora el propone Tweede Kamer, a traves di un medida luna pasa, pa mira den e posibilidad di duna un rol mas fuerte pa Hulanda den maneho y supervision di e sistema di cumplimento di ley di St. Maarten pa 5 aña.

E mocion, cual a ser adopta pa un mayoria amplio di Tweede Kamer dia 15 di october ultimo, a pidi gobierno Hulandes pa cuminsa combersa cu gobierno di St. Maarten tocante e division di maneho/supervision y autoridad den mantencion di orden y cumplimento di ley, y pa mira na ki grado Hulanda por hunga un rol mas grandi den e maneho/supervision pa un periodo di 5 aña.

Den un entrevista cu The Daily Herald, Van Dam a splica su motibonan pa pausa e mocion, cual a ser co-firma pa cinco otro parlamentario di cinco partido diferente. Van Dam a ripiti su preocupacionnan grave tocante cumplimento di ley y orden na St. Maarten.

Van Dam, ex-polis y fiscal, a bisa cu e preocupacion aki ta origina no solamente riba feedback cu e ta ricibi di residentenan di e isla y locual e ta lesa den medionan, sino tambe e hecho cu gobierno ta cambia frecuentemente a resulta den ehecucion inconsistente di politica den area di Husticia. “Mi ta keda scucha storianan preocupante for di St. Maarten. Gobierno ta keda cambia, y gobierno nobo ta tira afo e plan di e gobierno anterior. Esaki ta hiba na descontinuacion di politica, cual no ta bon pa sistema di husticia, pasobra e ta rekeri politica y inversion consistente.” Ademas el a resalta e capacidad limita di cumplimento di ley riba e isla.

E division entre maneho/supervision y autoridad ta claramente stipula na Hulanda. E responsabilidad final di maneho di, por ehempel, Polis na Hulanda, ta cu Minister di Husticia y Siguridad. Sinembargo, autoridad local y maneho diario di polis ta responsabilidad di e municipalidad unda e facilidad ta ubica. Esaki ta diferente na St/Maarten. “Na St. Maarten, pero tambe na Corsou y Aruba, e responsabilidadnan aki ta teni pa un persona: minister di Husticia. Tur cos ta conecta hopi cerca, y no ta algo straño pasobra e islanan ta chikito.” Si Hulanda tuma over maneho/supervision di cumplimento di ley, esaki por pasa solamente a base di consenso, segun Van Dam ta reconoce.

“Pero mi ta convenci cu hopi hende lo haya cu esaki ta un bon iniciativa, pasobra un sistema di cumplimento di ley di nivel halto, eficiente, ta beneficia comunidad. Ademas mi a nota cu hopi hende riba e isla no tin confiansa den con cos ta canando awo.”

Van Dam a expresa aprecio pa e trabou cu e recien- renuncia Minister di Husticia, Cornelius de Weever, a realisa, y e hecho cu el a acepta e asistencia cu Den Haag a ofrece. “Sinembargo, ainda tin hopi cu mester haci, e prizon siendo e prioridad di mas halto.”

Gobierno Hulandes, den opinion di Van Dam, lo mester tuma over e rol di maneho/supervision pa asina por trece cumplimento di ley na e standard y sigura continuidad. Esey no ta nifica cu gobierno Hulandes lo paga completo pa esaki.

El a remarca cu St. Maarten ta paga pa asistencia di Polis Nacional di su propio saco. “Mi lo bisa cu St. Maarten lo mester ta contento pa e gran responsabilidad aki ser tuma pa algun aña. Mi a na altura cu e iniciativa mester bin for di St. Maarten, pero mi ta spera cu gobierno local mira e urgencia”, el a bisa. Segun Van Dam, pa trece e sistema di ley y orden na un nivel mas halto tambe ta necesario pa preveni cu cosnan lo empeora. Ademas, un situacion deteriora lo por resulta den un aanwijzing di Conseho di Minister di Reino. “Mi ta spera nos no caba den e situacion unda esaki lo ser regla den atmosfera di garantia di funcionamento di Reino, Articulo 43 di e Charter.”