Cu e cantica cu ‘Ban keiro’, canta pa e mucha muhe Kitai de Jongh, ambiente a wordo crea pa e muchanan por gosa, canta y baile den cuadro di apertura di e Festival di Buki pa Mucha 2019 na Cas di Cultura.
E di 27 version di e festival aki tin como tema central ‘Medio di transporte’. Diferente autor di buki y ilustrador tabata presente. Tambe a tuma luga e mercado di buki cu participacion di varios libreria.
Minister Presidente, Evelyn Wever-Croes; minister di Enseñansa, Rudy Lampe y parlamentario Shaliny Tromp-Lee a ricibi un ehemplar di e buki di e festival: ‘Faro Multicolo’, for di directora di BNA, Astrid Briten. Entrante otro siman e diferente autor di buki y ilustrador ta bishita scol pa stimula mucha pa lesa.
