Ayera mainta haciendo uzo di un chubato di e compania Arubaanse Wegenbouw a tuma luga e groudbreaking di e proyecto di embeyecemento di e area pafo di e misa Santa Filomena na Paradera.

Minister di Infrastructura, Otmar Oduber den compania di Director di DOW, Marlon Croes y den presencia di e Pastoor Toti Fuentella, a declara cu gobierno di Aruba a mira e necesidad di haci inversion den barionan pa sigura e calidad di bida di e hendenan. Den e caso aki e ta haya cu e inversion di 1.1 miyon florin lo contribui no solamente e misa, pero tambe e dos scolnan cu ta comparti e area aki. E mandatario a indica cu nan a hiba un proceso transparente pa loke ta un destaho publico caminda e compania Arubaanse Wegenbouw ta encarga cu e trabou, mientras DOW tabata encarga di e diseño di e proyecto.

E ta un trabou cu ta tuma varios luna, y mirando e temporada cu ta biniendo di Pasco y Fin di Aña na luna di december awor, nan a palabra pa bin cu un bon coordinacion cu e compania menciona y DOW pa den e luna di december tuma un pauze. Asina e area aki por keda accesibel, pero na januari nan lo continua, y den un trayecto di tres luna e proyecto mester wordo finalisa.

Nan a firma un acuerdo entre DOW (Gobierno) y parokia di Paradera, caminda e parkinglot completo di e misa y e area rond di dje ta keda habri pa wordo uza durante e proximo 5 aña den un forma publico. Esaki ta facilita cu e mayornan y e muchanan di scolnan tin acceso pa garantisa e parti di siguridad y no solamente di embeyecemento.

Minister Otmar Oduber a elogia e trabou cu Pastoor Toti hunto cu e parokianonan di e misa Santa Filomena ta bin realisando activamente pa e renobacion di e misa, pero tambe di e construccion di e cas parokial den cuadro di e 70 aniversario di e parokia aki. Esaki den cuadro di e hubileo aki mescos cu a wordo haci cu e Pro Catedral San Francisco na Playa cu nan 100 aniversario. Igualmente e mandatario a bisa cu nan tin un compromiso cu e misa Santa Teresita na San Nicolas pa embeyece y trece siguridad den e area aki.

Parokia Paradera.
Pastoor Toti a expresa su sentimento di gratitud na Minister Otmar Oduber y Gobierno di Aruba pa e inversion substancial aki. Specialmente e aña aki cu ta uno importante pa nan parokia cu ta celebrando su 70 aña di existencia. “Ki bunita pasobra coincidencialmente e drechamento y embeyecemento di e luga aki ta tuma luga den e aña caminda nos ta celebra nos 70 aniversario,” el a declara. E religioso a agrega den un frase cu si ‘nos ta haci cosnan bunita nos ta cerca na Papa Dios.’ El a considera e trabou aki como un capitulo importante den historia di e parokia.

E acto aki a conta cu presencia di Vicario Episcopal na Aruba, Pastoor Andres Makowiec, pero tambe cu e representantenan di e cuerpo di docente di Maria Goretti College y Colegio Pastoor Kranwinkel, situa den e bisindario di e misa.

DOW.
Di su banda, Director di DOW, Marlon Croes a declara cu e trabou aki ta un proyecto di embeyecemento di e area y unda nan lo bin cu un diseño di e parkinglot cu ta duna e posibilidad cu nan lo por pone hardin cu irigacion y luz. Esaki ta pone e situacion rond di e misa mas agradabel y mas sigur pa e muchanan cu ta bayendo scol unda nan a yega di pone plataforma pa bou di e misa pa calma e trafico.