Ayera durante Het Nationaal Onderwijs Congres cu SKOA a organisa pa su scolnan, organisacionnan manera FAVI y Respaldo tabata presente pa ofrece tayer tocante muchanan cu limitacion visual y tambe e comportacion y problemanan di muchanan den klas.

Cetty Baarh, director di FAVI a splica cu nan ta participa cu e tarea di ilustra pa tur maestro kico exactamente ta pasa ora cu tin un mucha cu limitacion di bista den klas. Esaki kiermen cu e mucha tin un limitacion y ta nifica cu e ta wak menos, pero por ta tambe cu e mucha ta totalmente ciego den klas.

Tocante esaki, Baarh a menciona cu nan ta ilustra na unda cu e maestronan ta bay haya diferente tarea pa haci y tambe nan a mustra ki materialnan y mashinnan por uza na momento cu tin un mucha cu limitacion di bista.

Tocante e tayer, el a señala cu ta totalmente interactivo pa e maestronan mes sinti kico e ta pa tin un limitacion di bista, pa motibo cu esey ta e unico manera cu nan ta bay compronde tambe con e mucha den klas ta sinti.

Baarh a trece dilanti cu na Aruba tin un cantidad di 3.105 persona cu tin un limitacion segun Censo. Di esakinan, nan tin casi 360 persona registra cerca FAVI y ta existi 40 mucha cu limitacion den e sistema di educacion cu ta wordo guia door di nan maestro.

Di otro banda, Misha Raymond, psicologo y specialista di salud mental di mucha na Respaldo, a bisa cu tocante comportacion di muchanan den klas, hopi biaha tin cierto muchanan kende no ta bay bon y a splica con esey tin di haber cu psikiatria.

Raymond a declara cu hopi biaha e experiencia por ta mas fuerte di loke tur hende ta kere. Un mucha ta hopi ora den klas den un dia y cu esaki e maestronan lo haya e tipnan of con nan por haci cu casonan dificil, pa por compronde miho e comportacion di e mucha.

Tambe a señala cu hopi biaha e muchanan ta pasa den cos hopi dramatico, loke ta trata problemanan di abuso, problemanan financiero di mayornan of problemanan na cas, pero loke ta mas importante ta pa nan traha miho y tin un bon comportacion den klas.

Den caso aki, aworaki nan ta haya ayudo mas lihe y loke nan ta haci ta pa purba cera e distancia entre diferente instancianan, incluyendo scol y cuido di muchanan cu tin problema den nan comportacion. “Ta hopi importante pa e instancianan sinta mas hunto pa wak kico ta e necesidad di tur hende, ora ta trata di un hende cu ta involucra cu un mucha’, por ehempel, si e psicologo ta mas involucra y si nan mester pa scol ta un tiki mas amplio den nan structura, Raymond a finalisa.