Prome Minister, Evelyn Wever-Croes a sigura cu gobierno ta trahando pa soluciona e problema di finanzas publico y debe nacional cu nan a hereda di gobierno anterior, sin mas medida, a pesar cu organo di supervision financiero (CAft) kier pa bin cu mas medida.
E no ta desconoce cu e asunto aki di finanzas publico ta uno compleho, y aunke nan ta comparti CAft su preocupacion riba asunto di gasto di personal y e plan di belasting. El a sigura cu tambe gobierno di Aruba ta preocupa y constantemente trahando riba dje. Pero nan prioridad ta pa soluciona e problema aki, y pa cera e gap financiero sin mas medida.
Nan ta trahando pa cera e presupuesto 2020 cu ainda no a bay Parlamento, a pesar cu e fecha prescribi den constitucion a pasa caba. Sinembargo, e ta reconoce cu e situacion ta asina dificil cu nan no por haya un solucion lihe. E ta haya cu ora cu gobierno ta asina leu di presenta su presupuesto 2020 cu mester tin un surplus di 50 miyon florin, e ora si CAft lo por duna su opinion riba dje. “Por lo pronto e ta keda un preocupacion cu nan a expresa…” el a bisa.
Pues dificilmente CAft por papia di bin cu medida si of no. El a splica cu un motibo pakico gobierno kier yega na un surplus, ya cu a yega momento pa baha nos debe nacional pa asina por baha inflacion y stimula y crece nos economia. Pero fundamentalmente, pa cumpli cu e deseonan cu ta biba den nos comunidad tambe.
