Colegio di supervision financiero di Boneiro, Sint Eustatius y Saba (Cft) ta pidi Colegio Ehecutivo y Conseho Insular di Boneiro pa presta atencion na realisacion di e propositonan di maneho presupuesta. E di dos reportahe di ehecucion ta mustra un descenso bou di e limite di e gastonan di personal, mientras cu fortalecemento di e cuadro di empleado publico ta punta di lansa di Boneiro pa basta tempo caba.

Cft a bishita Boneiro dia 22 di october y a tene combersacion cu, entre otro, e miembronan di Colegio Ehecutivo y di Conseho Insular.

Presupuesto di 2018 y 2019.
Dia 25 di juni Conseho Insular a aproba e cuenta anual di Boneiro pa 2018. A cera e aña ey cu un resultado positivo di 12,7 miyon dollar. Di e surplus aki Conseho Insular a destina 7,1 miyon dollar pa, entre otro, infrastructura y trabounan di mantenemento.

E di dos reportahe trimestral di 2019 ta mustra te y cu juni 2019 un saldo positivo di 11,2 miyon dollar. Cft ta pidi Colegio Ehecutivo pa realisa su propositonan di maneho diligentemente, pa evita cu ta cera aña 2019 tambe cu un surplus. Cft tambe a pidi Colegio Ehecutivo un biaha mas pa presupuesta e entradanan fiscal y e gastonan di personal di manera mas realistico. E ultimo añanan a calcula e gastonan di personal mucho halto y e entradanan fiscal mucho abou.

Ehecucion di e Acuerdo Administrativo.
E Acuerdo Administrativo, cera entre Boneiro y Hulanda na november 2018, ta den ehecucion for di april di e aña aki. A presenta e di dos reportahe di progreso cuminsamento di october. Di esaki por deduci cu a cuminsa cu fortificacion di e capacidad di ehecucion. Sinembargo, mester libra mas bataya riba e tereno aki. Pa tal motibo, Seccion di Personal y Organisacion (P&O) for di luna di mei ta haciendo un analisis di e datonan di personal. A base di e resultadonan di e investigacion aki lo elabora un plan di mehoramento. Cft ta warda e plan aki cu masha interes.

Ciclo di presupuesto y su hustificacion.
Cft ta constata mehoramento den varios aspecto. Asina, por ehempel, e ciclo di presupuesto y su hustificacion ta cana segun planificacion. Dia 7 di augustus a entrega e proyecto di presupuesto di e aña presupuestario 2020 cerca Cft pa duna su conseho y dia 2 di september a present’e na Conseho Insular, teniendo cuenta cu e conseho di Cft.

Tambe a progresa un poco cu yenamento di personal den e Huntanan di Comisario di e entidadnan gubernamental. Na Water en Energiebedrijf Bonaire (WEB) y Bonaire International Airport (BIA) entretanto e Huntanan di Comisario ta completo. Colegio Ehecutivo ta trahando actualmente riba yenamento di personal den e Hunta di Comisario di Oil Trading Bonaire (OTB). Entregamento na tempo di e cuentanan anual di e entidadnan gubernamental ainda ta rekeri hopi atencion si.

Maneho financiero.
Colegio ta pidi atencion constante di Colegio Ehecutivo y Conseho Insular pa e maneho financiero, cual te ainda no ta na ordo. Esaki ta sali na cla, entre otro, di e declaracion di abstencion di aprobacion di e accountant pa e cuenta anual di 2018, a base di e foutnan y incertidumbre constata. Si no bin cu mehoramento, esaki lo por obstaculisa hayamento di un declaracion aprobatorio di accountant pa e cuenta anual di 2021.

Na september a presenta e plan di mehoramento di e maneho financiero 2.0 na Colegio Ehecutivo. Parcialmente a incorpora e subproyectonan habri, procedente di e plan di mehoramento 1.0, den e plan di mehoramento 2.0. Cft lo monitor cu masha atencion implementacion di e plan di mehoramento di e maneho financiero 2.0.