E emergencia humanitario ta creciendo na Venezuela y esey por observa na su fronteranan. Den ultimo cuatro luna 595.707 Venezolano a huy di nan pais, di acuerdo cu e conteo di cada luna di Agencia di Nacionnan Uni pa Refugiado (Acnur). Por compara esaki cu e salida completo di henter poblacion di estado Nueva Esparta.
Desde juni, di e principal paisnan di acogida, Ecuador, Chile y Peru a establece restriccion pa entrada di Venezolano na nan teritorio. Pero exigencia di visa no a detene e exodo, considera pa Acnur esun mas grandi di historia reciente di e region. Na juni a emigra 163.717, na juli 144.720, na augustus 108.340 y na september 178.930, pa un total di 595.707 migrante nobo den 120 dia so.
“Na Venezuela tin un violencia silencioso cu ta expulsando hende, cu ta matando nan. P’esey nan ta dicidi di sali. No tin un guera habri cu arma, bom, manera ta sucede na Siria. Ta trata di un violencia psicologico, silencioso, cu ta haci cu tin migracion,” e sociologo y specialista den migracion di Universidad Simon Bolivar, Claudia Vargas, ta splica.
Vargas ta destaca cu e salida aki, cu ya ta suma mas di 4,5 miyon migrante y refugiado, ta avansa aceleradamente: “Den 3 aña so a sali mas hende di Venezuela cu a emigra desde 2011 di Siria.”
Logra un status legal pa e migrantenan Venezolano ta keda un materia dificil. Di 4,5 miyon, solamente 2 miyon ta conta cu permiso di residencia y di estadia regular. Colombia a legalisa, segun Acnur, mas di 677.000, Peru otro 466.000 y Chile 325.025. Esaki ta e paisnan cu cantidad mas grandi di Venezolano cu tin un status legal.
