Presupuesto 2020 entrega pa fin di luna Ambos partido mester benta ‘awa den biña’ pa asunto di indexering

Ultimo dianan tabatin varios manifestacion, entre nan di SIMAR, cu hunto cu otro sindicatonan cu ta representa trahadonan di e sector publico ta hibando un lucha pa indexering. Parlamentario Edgard Vrolijk kende ta bin di e sector di enseñansa a laga sa cu como organo legislativo, nan no a sali di un manera negativo, mas bien positivo, riba e lucha aki.

Ayera gobierno tambe a habri espacio pa reuni y dialoga cu e sindicatonan, mirando cu awor tin mas cifranan, ya cu pa fin di luna mester entrega e presupuesto 2020 di pais Aruba. E ta den cuadro di tempo cu a wordo pidi na gobierno di Reino pa cera e ley aki, el a bisa.

E parlamentario ta kere cu nan ta para atras di un lucha di e clase trahado. “Unda bo ta bringa pa algo cu ta kere cu bo merece,” el a bisa. Encuanto indexering mes, nan por discuti si ta mara na ley of no, pero logicamente e sindicatonan mester para pa e derecho di nan trahadonan y ta lucha pe, el a expresa. Pero e no ta kere cu aworaki nos no ta den un era pa bay den un welga pisa manera esun di 2008, caminda basta menasa a cay ariba.

Vrolijk a desea di antemano cu den e reunion cu gobierno tabatin programa ayera cu e bloke sindical di e sector publico, nan por a sali for di nan diferencia na bienestar di pueblo. E ta bisa na bienestar di pueblo pasobra nos mester tene cuenta cu Aruba tin alrededor di 110 mil habitante, y e ta kere cu den e lucha aki, locual e sindicatonan ta pidi (cu ta un indexering di 3.6%), no mester tin consecuencia pa e otronan tampoco.

Como gobierno -segun e Parlamentario en cuestion- semper nan a pidi tempo, manera nan a haci cu Hulanda. Pero tambe pa atende otro asuntonan, entre nan indexering, pa asina crea e panorama financiero y economico di e pais aki. Seguramente den esey lo busca mas entrada. E ta spera cu mas pronto posibel lo por cuminsa cu e proyecto hotelero na Sero Colorado (San Nicolas). Tambe e echo cu gobierno a firma un acuerdo di entendimento (MoU) cu CITGO, ta duna otro alternativanan pa crea entrada.

“Tin cosnan den horizonte cu ta bay crea espacio pa asina Aruba merece miho,” el a bisa.

E ta haya cu como doño di trabou pais Aruba (gobierno) mester carga su responsabilidad y por duna den un espacio financiero si tin pa haci esaki.

“Pero e no por ta asina cu den momento cu e ta bira desproporcional, bo ta laga interes general un banda,” el a declara.

Vrolijk ta kere cu ambos parti mester benta ‘awa den biña’ pa por logra yega na algo cu ta duradero y cu ta beneficia gobierno, pueblo di Aruba y e trahadonan.