Camara di Representante di Puerto Rico a rechasa recientemente e recorte di 8,5% den e pension di empleado publico cu e Junta di Supervision Fiscal (JSF), di Congreso Mericano, a propone, como tambe etotalidad di e Plan di Ahuste di Debe presenta pa e entidad federal aki.
Presidente di e Camara, Carlos ‘Johnny’ Mendez Nuñez, a declara cu e Camara no lo aproba ningun legislacion nobo cu ta implica reduci e pension di e ex-empleadonan publico. A keda aproba unanimemente un mocion di e Camara pa rechasa e propuesta, cu autorisa e presidentenan di Camara y Senado pa hiba e rechaso mas aleu.
Mas tempran, Mendez Nuñez a reuni cu lidernan di e movimento Construyamos Otro Acuerdo, cu dia 20 di october a organisa un manifestacion contra e reduccion di pension cu a yega te na La Fortaleza. Segun Mendez Nuñez, tin otro area den gobernacion unda por corta gasto, pero no den e pensionnan; esey ta su mensahe na JSF.
Ta trata di e pago di pension mensual di 167.000 pensionado ex-empleado publico, cu ta haya pension paga pa estado, incluyendo un grupo di maestro y docente di enseñansa na e isla. Puerto Rico ta lidia cu e consecuencianan di un debe publico di mas di US$ 70.000 miyon, cu a conduci na intervencion federal, cu creacion di e Hunta di Supervision Fiscal pa Congreso Mericano.
Nota di redaccion:
Puerto Rico, cu 3,4 miyon habitante, tin un debe publico comparable cu Aruba (115.000 habitante y US$ 2.388 miyon di debe, di alrededor di US$ 20.000 per capita den ambos caso.
