Cuminda vegetariano y saludabel ta un concepto cu ta hayando cada dia mas forsa riba nos isla. Sr. Rober Bautista di Green Food Service a declara na Bon Dia Aruba cu tres aña pasa nan a bin cu e concepto di un restaurant di cuminda vegetariano y saludabel, a pesar cu nos cultura gastronomico ta otro. Sinembargo e acogida a bira uno grandi cerca e turistanan y hendenan local
E ta splica cu e sorto di cuminda aki ta hayando un gran aceptacion den cuadro di un cambio di mentalidad di estilo di bida pa un “healthier life”. Mas hendenan ta bayendo den e direccion aki. “Hopi hende ta tumando consciencia di alimentonan saludabel.”
Nan clientenan ta uno varia y algun di nan ta yega cerca nan pasobra “dokter a bisa nos cu nos mester of bebe remedi of come saludabel”. Nan ta clientenan di 40 aña pariba cu mester bin cu un cambio riba nan alimentacion ya cu nan ta sufriendo di problema di salud manera colesterol, presion halto, etc.
Sr. Bautista a laga sa cu nan concepto ta mas tanto pa e generacion nobo pa asina nan cuminsa tuma consenshi riba come cuminda saludabel, pa ora cu nan ta yega na edad di 40 aña nan no mester bay dokter pa motibo cu nan no ta comiendo sano ni balansa.
Nan kier cu ora nan ta yega na edad aki, nan clientenan ta gosa di un bida saludabel. Algo cu e ta ripara ta cu nos hende a bira mas consciente y nan ta comiendo hopi saludabel. E echo aki ta anima y motiva nan pa sigui cu nan restaurant.
Producto fresco
E restaurant aki tin tres aña di existencia unda e prome aña nan a traha a base di pedido y deliver; y ultimo dos aña nan a establece nan restaurant Green Food Service.
A pesar cu na Aruba mayoria di nan fruta y berdura ta importa, el a bisa cu tur e productonan cu nan ta uza ta fresco y no tin nada den freezer. Nan ta cumpra tur nan berdura riba e mesun dia cu nan ta bay traha nan cumindanan. Nan a traha un menu special pa cada dia di siman di dialuna pa diasabra. Cada dia ta un menu diferente ya cu e ta un restaurant vegetariano “si bo ta come tur dia e mesun cos e ta bira hopi laf”, el a bisa.
Constantemente nan ta purba di bin cu cos nobo y nan ta purba di ta creativo semper haciendo uzo di berdura nobo, y si nan ta haya un cuminda atractivo nan ta introduci den nan menu. Tur nan plato ta acompaña entre otro cu “quinoa” cu tin hopi propiedad beneficioso pa salud di hende.
Recientemente Bautista a bay representa e restaurantnan cu ta sostene e programa di Aqua48, caminda nan entrega un donacion di 3.500 florin na fundacion Siñami Paso pa Paso. E fondo aki ta producto di loke e restaurantnan ta produci ora cu nan clientenan ta ordo awa. Nan por scoge entre awa gratis y Aqua48, unda nan ta contribui cu 1florin cu refil gratis, y e placa ey ta bay den forma di donacion pa un fundacion local.
