Rocco Tjon (MEP): Candelaria (AVP) tambe ta desaproba mocion van Dam (CDA)

Cu desaprobacion di e mocion di van Dam, Robert Candelaria ta admiti cu Ministerio Publico y Husticia ta funciona imparcial. Esaki contrario na loke Mike Eman a insinua cu Ministerio Publico lo ta un instrumento politico.

Durante ultimo reunion di comision fiho di Husticia a elabora riba e mocion di Chris van Dam (CDA). Den e mocion, cual no a wordo trata ainda den Parlamento Hulandes, e Parlamentario Hulandes ta desea pa Husticia bira un asunto di Reino.

Reunion comision fiho di husticia.
Siman pasa Tjon a yama un reunion cu Minister di Husticia pa entre otro trata e topico aki. Minister di Husticia A. Bikker a duna un splicacion amplio dicon e no ta di acuerdo cu e mocion. E splicacion tabata uno cual ta enfoca riba aspectonan constitucional y practico. Minister a duna di conoce tambe cu e ta asombra cu e deseo di e politico Hulandes pa e motibo cu durante reunionnan cu e ministernan di Husticia di Reino e topico aki nunca a wordo treci pa dilanti.

Posicion parlamento di Aruba.
Ningun fraccion cu tawata presente durante e reunion di comision ta di acuerdo cu e argumentonan di Van Dam. E Parlamentario Hulandes ta insinua cu mirando e grandura di nos islanan, comunidadnan chikito, Husticia no lo por funciona optimal ora ta trata investigacionnan di casonan coruptivo.

Remarcabel ta cu despues cu lider di partido AVP, Mike Eman, a ataca Ministerio Publico frontal e miembro di CDA a trece e mocion aki den Parlamento Hulandes. Den e comision fiho Candelaria tambe a duna di conoce cu e no ta di acuerdo cu e ponencia di sr. van Dam y ta sostene fraccionnan di coalicion pa e punto aki no subi agenda di IPKO. Di e manera aki Candelaria ta admiti indirectamente cu nos Ministerio Publico ta funciona imparcial y no ta un instrumento politico manera Eman a insinua siman pasa.

Pa conclui.
Aworaki e decision di e comision aki lo bay wordo ancra den un decision di comision central. Nos ta pensa cu tin diferente aspecto riba tereno di Husticia riba cual por conta cu un colaboracion mas intenso entre e paisnan den Reino. Pero como pais autonomo e ta keda na Aruba pa atende cu Husticia den e caso aki.