E proceso largo pa logra un contracto colectivo (CAO) pa un grupo grandi di trahadonan di e sector di construccion na servicio di e asociacion WAB, finalmente ta yegando na bon termino. E ta un CAO di por lo menos tres aña.
Mediador di Gobierno, Anselmo Pontilius kende ta brindando su intermediacion den henter e proceso aki, a declara na Bon Dia Aruba cu actualmente e proceso aki a bay asina leu cu aworaki tin intercambio di proposicion di cada partido envolvi.
Pontilius a bisa cu e trahadonan representa pa sindicato STA ta bin sintando na mesa pa varios luna, aunke nan a yega di stop pa algun periodo pa reuni cu gobierno. Durante e reunion cu nan a sostene cu gobierno, nan a mustra e retonan cu e sector di construccion ta pasando aden. Te hasta e companianan cu ta cay den e asociacion WAB a traha un tipo di rapport, den cual nan ta señala oficialmente na gobierno e situacionnan iregular cu tin den e sector aki.
Nan a reuni durante e ultimo simannan y despues cu e dunado di trabou (WAB) a scucha e sindicato (STA), nan a palabra cu awe tardi nan lo continua. Di parti di dunado di trabou a wordo manda un contra oferta riba e pakete financiero. Tin cuater punto specifico cu e partidonan tin distancia for di otro, entre nan esun di aumento general di cada aña.
Den e reunion di awe tardi ambos parti cu presencia di Mediador di Gobierno ta bin cu nan respectivo proposicion ariba mesa. “Mi ta kere cu mirando e contenido tin un acercamento basta positivo,” Pontilius a declara na Bon Dia Aruba. E acercamento positivo aki lo haci cu eventualmente den e proximo simannan tin un resultado final.
