Despues di dos reunion den Parlamento pa atende cu e ley di Serlimar, Minister Otmar Oduber ta kere cu e momento a yega pa trek e liña te hasta unda mas cambio lo wordo introduci den e ley, pa no cambia su meta cu e tin su tras riba maneho di sushi y desperdicio na Aruba.
E hecho cu mester torno un ley djis pa complace interes personal –pa Oduber– no ta den su agenda. E ta dispuesto pa atende cu cambionan di ley cu ta na bienestar general di pais Aruba, el a laga sa.
El a bisa cu nan tin mas cu un luna discutiendo e ley den Parlamento. El a reuni por lo menos cuater pa cinco biaha cu gremio comercial. Igualmente mas cu shete pa ocho biaha cu Parlamento den diferente comision. Tambe nan a bin cu diferente cambionan durante e tratamento cu ta tumando luga den nos organo legislativo.
“Mi ta kere cu cierto momento mester un linea. Anto mester tuma un decision,” el a bisa. Pasobra pa e mandatario, e unico discusion cu e ta scucha ainda ta esun di interes personal y comercial, y e no ta participa den un discusion di e categoria aki.
Encuanto Oduber su habilidad politico pa por concilia cu e diferente parti envolvi den e discusion aki, y por asina logra un consenso pa finalmente por concipia cu e ley di Serlimar por carga aceptacion di un gran mayoria, esaki ainda no a bira posibel.
E mandatario a bin cu dos nota di cambio, caminda e ley den su concepto original a haya diferente modificacion y cambio. Pero tambe Parlamento ta trahado riba un amienda. Cuanto mas e mandatario aki por ta flexibel pa mas cambio, el a contesta cu un pregunta: “Mas flexibel ainda?”
Te hasta unda mas cambio.
Sinembargo e no ta descarta cu semper por haci un producto final miho di e ley, ya cu e ta parti di democracia y tambe di e proceso di e mesun ley di Serlimar. Esaki ta wordo refleha den tanto cambio cu a wordo introduci recientemente, el a bisa.
Oduber a agrega cu nan a tuma nota di hopi cambio cu a bin di parti di fraccionnan, incluyendo oposicion, cu a wordo treci dilanti y tambe di otro instancianan. E ta cualifica nan como reunionnan pisa, pero fructifero, ya cu a bini cu bon sugerencianan cu a wordo tuma den e ley aki.
Tur e cambionan aki ta resultado -segun e mandatario- di por a scucha tur hende, tambe contesta Parlamento, pero tambe despues cu Raad van Advies (RdA) a manda su conseho. Pero e ta kere cu aworaki si a yega e momento crucial pa ‘getrek e liña awor.’ Pasobra sino, nunca mas lo wordo tuma un decision pa atende cu e problema di maneho di sushi y saneamento di e dump. Pues den e trekmento di e liña aki lo yega e momento pa cada un di e representantenan di pueblo den Parlamento por mustra pa kico nan ta para pe.
E ta haya cu ora cu ta bin cu cambionan grandi pa medio di un ley, nunca por complace tur hende. Oduber a bisa bon cla cu e ‘no t’ey pa complace niun interes personal di niun hende’. E mandatario a argumenta cu a bin cu e ley aki a base di consehonan di experto, estudionan cu a wordo haci con gobierno mester atende cu e problema di sushi y tambe di e dump na Parkietenbos.
