Ayera mainta na Mangel Halto, Minister di Desaroyo Teritorial, Infrastructura y Medio Ambiente Otmar Oduber, conhuntamente cu Hunta di Supervision di Fundacion Parke Nacional Aruba (FPNA) y Director General di FPNA, oficialmente a entrega e Plan di Maneho Preliminar cu a wordo crea pa Parke Marino Aruba.
Parke Marino Aruba ta e resultado di e proyecto funda door di EU Best, unda TNO Caribbean hunto cu Directie Natuur en Milieu, y Ministerio di Desaroyo Teritorial, Infrastructura y Medio Ambiente a colabora pa realisa e establecimento legal di e areanan di Parke Marino Aruba.
Oduber a splica cu poco poco nan ta logrando e meta di conscientisa e comunidad riba e importancia di medio ambiente, su cuido y con esey ta regula a traves di metanan pa cuido di medio ambiente.
El a menciona cu dos aña pasa nan a cuminsa e combersacion cu tin cu tuma luga pa cu statuutnan di parke. Mediante esaki, Oduber a menciona cu e maneho integral cu nan kier crea pa medio ambiente a cuminsa cu cambionan di statuutnan di Parke Nacional Arikok e tempo ey y cu Gobierno no tabata di acuerdo pa e forma cu esey a tuma luga.
Di mesun manera, Oduber a bisa cu awendia tin un hunta directiva nobo, cu a inclui e cambionan di loke tabata trata e creacion di un parke nacional cu un Fundacion cu por atende no solamente Parke Arikok, sino cu tambe a extende te Spaans Lagoen.
E plan di maneho actual ta uno teoretico y ta enfoca riba e metanan cu kier logra y kico mester realisa pa maneha e areanan protegi den un forma cu lo cumpli cu e metanan aki.
Siguientemente, e plan ta indica un periodo transitorio di 2 aña, unda lo pone enfasis riba duna informacion, participacion y consulta di stakeholders, sondeo y investigacion, amplia conservacion marino, crea capacidad den organisacion y establece un financiamento sostenibel.
Tocante e piscadonan, Oduber a manifesta cu tur e palabracionnan cu e tabatin cu nan ta inclui den esaki. Nan a forma un comision cu tur e personahenan di ranchonan cu a trece nan preocupacion dilanti. Oduber a sigura cu tabatin un grupo cu tabata haci hopi critica negativo, pero ora e grupo aki a sinta na mesa, a participa hopi den representacion di e diferente rancho y asina mes nan a bin cu mas idea pa mas proteccion cu tin cu tuma luga, pa motibo cu como piscadonan, kier proteha cierto animal.
Tambe Oduber a splica cu pa via di comentarionan di e piscadonan, a amplia e Parke Marino cu un seccion completamente nobo, specialmente esun di Punta Brabo te na entrada di waf.
Di su parti, director general di Fundacion Parke Nacional Aruba, Roland de Cuba a conta cu na 2016, Gobierno di Aruba hunto cu TNO Caribbean a ricibi fondonan di e programa Best 2.0 pa asina establece areanan marino protegi (MPA Marine Protect Areas).
E programa di Best 2.0 tabata inicio di e proceso pa yega na un Parke Marino na Aruba y na 2018 a keda estableci pa ley. Esaki a trece bou cuido di FPNA dia 16 di april di e aña 2019. E Parke Marino ta consisti di cuatro area proteha, esta: MPA Arikok, MPA Sero Colorado, MPA Mangel Halto y MPA Oranjestad reef island.
Nan lo aplica e sistema cu ta yama Ecosistem Based Management Sistem, cu ta encera cu nan lo haci promocion principalmente pa actividad cu ta menos destructivo of dañino pa e habitat marino. Sostenibilidad tambe ta un parti importante den esaki, De Cuba a expresa, y loke nan kier ta minimalisa e efectonan negativo riba medio ambiente marino.
De Cuba a sigura cu lo traha riba conscientisacion y sentido di propiedad pa cada MPA individual. Esaki lo wordo haci door di e consulta cu stakeholders y lo tuma esey como un di nan metanan principal.
Sietske van der Wal, manager interino di e parke, a finalisa bisando cu nan ta enfoca pa traha riba conscientisacion, pero tambe consulta cu stakeholders envolvi, pa motibo cu nan kier bin cu un plan practico cu ta bay funciona di forma duradero.
