Alcaldenan di municipalidad den region di Den Haag a duna un declaracion conhunto den cual nan ta rechasa ‘fuertemente’ e idea cu tin un cultura di discriminacion dentro di unidad policial di Den Haag, cual e liderazgo di e unidad ta ignora.
Cu e declaracion aki, alcaldenan di Delft, Leiden, Zoetermeer, Rijswijk y Leidschendam-Voorburg, entre otro, a responde na kehonan di organisacionnan di sociedad civil, un whistleblower y partidonan politico tocante racismo y discriminacion den polis, segun NOS ta reporta.
Recientemente, un grupo di 20 organisacion di sociedad civil y gruponan representando minorianan a entrega un keho oficial cu hefe di Polis Nacional, Erik Akerboom, tocante e unidad policial na Den Haag. Segun e gruponan, liderazgo di Polis na Den Haag ta ignora keho y reportenan di discriminacion, racismo y abuso di poder pa añanan largo.
Nan a menciona Fatima Abouloufa, anteriormente hefe di team na Polis di Leiden, cu ta cay bou Den Haag, kende na juni a post riba Instagram tocante racismo, discriminacion, abuso di poder y termento dentro di organisacion policial. Siman pasa el a informa cu e no ta bonbini den unidad di Den Haag mas. Minister di Husticia y Siguridad, Ferdinand Grapperhaus a bisa cu esaki no ta relaciona na su critica, pero no a aclaria pakico el a ser transferi. Consehero legal di Abouloufa a anuncia cu e ta entregando acusacion di difamacion contra Grapperhaus.
Dialuna, tres partido politico di Den Haag – De Haagse Stadspartij, Islam Democraten, y NIDA – a retira nan confiansa for di polis y anuncia cu nan ta dunando sosten na e keho entrega pa e organisacionnan di sociedad civil. E partidonan ta acusa liderazgo den polis di no haci suficiente contra discriminacion den nan unidad.
Pero e alcaldenan a rechasa e imagen aki, bisando cu pa cuestiona integridad di polis eroneamente, continuamente, ta peligroso.
Polis ta comete eror y ‘cosnan no semper ta bay bon’, e alcaldenan a bisa. Pero cu mester reconoce y siña di e erornan aki, y ora ta apropia, pidi disculpa y tuma medida.
