Despues di e segundo reunion cu a tuma luga dia diamars 15 di october ultimo riba e ley di Serlimar y cu a keda suspendi indefinidamente, Presidente di Parlamento, Ady Thijsen a declara na Bon Dia Aruba cu te ainda no tin un fecha specifico pa sigui cu e ley aki. “Mi no a tuma e decision ainda,” el a bisa.

Despues cu Minister Otmar Oduber a declara na prensa dialuna ultimo cu e lo desea di sa ki dia Parlamento lo sigui cu e reunion aki, ya cu nan amienda por ta cla caba y mas bien loke e ta sinti ta falta di boluntad, e matutino aki a acerca presidente di Parlamento. Den su rol como Presidente di Parlamento, Ady Thijsen a laga sa te ainda nan no tin un fecha. “E ta bay bin, pero mi no por bisa bo precies e dia,” el a bisa.

Responsabilidad.
Como presidente di e organo legislativo aki, e ta asumi su funcion den e forma cu e ta kere cu ta miho, el a laga sa. “Ami ta purba di haci’e di un miho manera posibel. Mi ta tene mi mes na e reglanan, ley y constitucion. E ta conta pa tur hende” el a bisa. Aunke e ta parti di MEP, e ta bisa cu den su funcion como presidente di Staten e mester ta obhetivo cu tur su 20 coleganan.

E tin e autoridad prerogativo -segun reglanan di parlamento- pa pone reunionnan. Logicamente e ta tene cuenta cu e lidernan di fraccion, gobierno, actornan, gremionan, etc… Normalmente cualkier parlamentario cu dos of tres firma por solicita un reunion publico pa atende cu un asunto. Of tambe nan por pidi pa cierto reunion por sigui. Pero na final, e ta esun cu mester tuma decision final si e ta pone e reunion, ya cu esaki ta e autoridad cu e tin como Presidente di Parlamento.

El a splica cu hunto cu ayudo di griffier, nan ta tene cuenta cu tur factor pa asina dicidi e fecha y ora di cada reunion den Parlamento. Pero considerando cu ya caba dos reunion a wordo dedica na e ley di Serlimar, y mirando cu banda di e ley importante aki, tambe tin otro asuntonan di prioridad manera ley di LAft y tambe asunto di SOGA y hospital cu ta uno urgente y cu mester bin cu un reunion publico cu Minister Dangui Oduber, ainda niun fecha a cay pa sigui cu e ley di Serlimar.

Tambe tin e situacion di e maestronan cu no ta contento y cu ta manifestando. Esaki ta haci cu na e momento aki, e ley di Serlimar mester warda un rato. Por ehempel e ley di LAft ta un asunto grandi cu mester atende cu gobierno di Reino (Hulanda), debi na e posicion cu nan a tuma encuanto e cambionan cu Parlamento a haci na e ley di supervision financiero aki. Pues e ta haya cu tur cos tin su prioridad y a base di esey, como presidente di Parlamento, e ta tuma su decision. P’esey e no a dicidi ainda e proximo fecha pa sigui trata e ley di Serlimar, pero e ta asumi su responsabilidad.

“Esaki ta algo importante pa tur hende sa. E no ta bay pa arogancia of pa kier mustra bo poder. No! E ta parti di un proceso democratico,” el a expresa na e matutino aki.

Thijsen ta indica cu den un proceso asina mester evalua bon, pasobra e decision cu bo ta tuma tin consecuencia. P’esey ta importante pa tur hende ta bon informa y bon documenta. Pero tambe mester sa hiba un debate fuerte pa finalmente tin decision.

Democracia y comunidad.
Thijsen ta haya cu e ley di Serlimar ta wordo atendi cu hopi atencion y cu hopi preocupacion tambe, ya cu tin diferente gruponan den comunidad tambe, y hopi hende cu ta sigui e proceso di e ley aki. Pues e ta un ley cu -segun presidente di Parlamento- tin hopi opinion riba dje.

Thijsen ta haya cu nan trabou den Parlamento ta pa nan por hiba e proceso di ley caminda e mester bay, conforme nos constitucion. Tambe e ta haya cu e proceso con e ley aki ta wordo atendi, ta bayendo den un caminda hopi democratico caminda e mandatario a bin cu dos nota di cambio y Parlamento ta bezig cu amienda. E ta kere cu aworaki hopi hende a absorba tur cos, y lo yega e momento pa evalua ki ora nan lo pone e fecha pa sigui cu e ley aki. El a aclaria cu esaki no kiermen cu no lo sigui trat’e, pero no aworaki.

El a referi cu den e prome reunion nan a bay asina laat cu mester a pospone, ya cu hopi pregunta a wordo formula na direccion di e mandatario cu e mester a contesta. Como presidente di organo aki, e no ta haya prudente sigui cu e reunion pa 10or y mey anochi, ya cu e ta uno cu ta demanda atencion y concentracion.

E di dos reunion tabata uno di hopi tension cu e por sinti for di cierto hende den e publico cu a conta entre otro cu presencia di e trahadonan di Serlimar, pero tambe di e trahadonan di EcoTech y EcoGas. E tension tabata asina halto cu a pesar cu den cierto momento e ta flexibel, respetando e principio democratico cu ta inspira Parlamento, ya cu e ta haya bon cu e comunidad por forma parti di e discusion. Pero e dia ey, el a yega di hala atencion di algun miembro di e publico. “Ami kier ta un presidente cu mi no kier dicta,” el a bisa.

Ademas e dia ey, nan sistema di transmision digital cu ta uno nobo y cu recientemente a cuminsa opera, a presenta fayo tecnico cu a haci cu varios biaha e reunion a keda suspendi. E ta kere cu como Parlamento nan mester cumpli cu e comunidad cu ta siguiendo e reunion. E ta lamenta cu e ley aki a wordo poni den un spot ‘hopi cayente,’ debi cu cierto hendenan y media ta manipula e topico aki cu informacion y documentonan.