Despues di e segundo debate den Parlamento, caminda e ley di Serlimar no a haya un consenso politico for di e miembronan di e diferente fraccion den Parlamento, minister Otmar Oduber a bay reuni un biaha mas den comision di nos organo legislativo pa sigui atende cu e asunto aki.

Unabes mas el a bisa na prensa cu e ley aki no tin di haci cu kier mata un compania di e sector priva. Den caso cu si lo bin, entre otro alternativa, cu un incinerator of un compania di exportacion pa atende cu e problematica di sushi, e tarea cu Serlimar tin pa ley ta uno cu ta continua. Pues e ta haya cu no mester hinca temor pa niun di e trahadonan di e diferente compania cu ta atende cu sushi y/of desperdicio.

“Pasobra e ley no ta prohibi niun hende, ni e compania priva, di continua di haci e trabou cu nan ta bin haciendo na e momento aki,” el a bisa. Si den caso cu e ley aki no pasa -segun e mandatario- nada lo pasa, sino cu nos lo sigui cu e mesun problema di e dump di Parkietenbos cu ta sigui bay halto, hendenan ta sigui muri, contagia y bira malo.

E ta haya cu tur hende a bay riba e discusion si lo bin of no un incinerator. El a reitera cu tin un destaho publico, cu no tin niun persona cu a wordo otorga e proyecto aki. Y te hasta el a splica den Parlamento cu pa bin cu un incinerator mester bin cu un cantidad di ley, incluyendo esun di Serlimar, cu mester wordo trata den Parlamento, prome cu ta yega na un incinerator.

Ademas for di e su notanan di cambio, e asunto di e incinerator a wordo saca for di e ley di Serlimar. Pero mientras e tipo di discusion aki ta continua, e problema di salud cu ta presenta cerca e habitantenan di Parkietenbos ta keda scala, si pais Aruba no ta tuma un decision.

 

Problema di salubridad.
Ayera mainta, durante un conferencia di prensa di gobierno, nos por a mira Oduber indigna pasobra den henter debate riba e ley di Serlimar, cu el a propone pa bin cu un maneho consistente y structura riba recogemento y procesamento di dushi y pa elimina e dump na Parkietenbos, niun di e sectornan di nos pais, incluyendo prensa, no a tene cuenta cu e situacion di salubridad di e habitantenan di e bario aki y bisindario.

Pa e mandatario tin un influencia di un ‘compania cu ta mete den democracia di pais Aruba’. E ta lamenta cu aworaki mas bien ta wordo papia, si nan ta defende interes personal, comercial di un compania riba si e ta perde of gana placa, sin tene cuenta cu esunnan cu ta perdiendo bida pa causa di e situacion no higienico y contra salud publico di e dump. Pa Oduber esaki mester ta e linea cu mester discuti e ley di Serlimar.

Te hasta el a indica cu den e cantidad di preguntanan cu el a haya riba e ley controversial aki, niun di nan ta enfoca entre otro riba e rapport cu PAHO a yega di traha na 2018, pa bin cu un saneamento di e dump na Parkietenbos, ya cu e ta un fuente di malesa y di infeccion.

El a trece dilanti cu te hasta instituto internacional a percura pa yega na e punto di ora cu Parlamento ta trata e ley di Serlimar, cu e empresa estatal aki (suis generis) cu tin e maneho di e dump di Parkietenbos y esun di Ser’i Tijshi y cu den futuro lo tin e maneho di sanitary landfill. Esaki ta nifica cu mester atende cu e solucion di e dos dump aki y percura pa bin cu un forma nobo di opera e maneho di desperdicio.

E mandatario a haci un yamado pa tur sector comercial, turistico, miembronan di Parlamento, prensa, pa conscientisa di e problemanan cu e habitantenan di Parkietenbos ta pasando aden pa varios decada. Te hasta bishita e bario aki y papia directamente cu e habitantenan, lagando un banda cualkier discusion politico rond di e topico aki.

“Ta basta di hunga… ta basta cu nos ta ignora e interes di e comunidad y interes general di nos hendenan pasobra nos kier hunga politica,” el a declara.