Presidente interino di Banco Central di Coursou y St Maarten (CBCS), Bob Traa recientemente a atende locual a ser describi como un ‘reunion introductorio’ cu e accionista y biyonario Persa-Mericano, Hushang Ansary di Parman Group. E reunion a tuma luga bou peticion di Minister di Finansa di St. Maarten, Perry Geerlings, segun Banco Central a bisa den un declaracion.
E reunion a tuma luga na Miami, Florida, durante un parada na caminda pa e reunion anual di Fondo Monetario Internacional (IMF) y Banco Mundial na Washington DC.
“CBCS ta e banco central di dos pais den e union monetario, y den esaki ta sirbi dos gobierno, dos minister di finansa y dos economia. Si un di e ministernan ta apela na CBCS, CBCS por responde na esaki”, Banco Central a bisa tocante e peticion di Minister Geerlings.
Banco Central a bisa cu no a haci ningun acuerdo ni compromiso durante e reunion aki. “Esaki no tabata e motibo di e reunion”, CBCS a bisa den un declaracion.
E proceduranan cu a inicia dia 11 di october, den interes di doñonan di polisa di ENNIA, lo continua, manera a declara. Compania di seguro basa na Corsou, ENNIA a cuminsa un proceso contra Ansary, doño di Parman Group, su yiu muhe Nina Ansary, su man drechi Abdallah Andraous como tambe ex-Directornan di ENNIA, Ralph Palm y Gijs van Doorn.
E compania, actualmente bou regla di emergencia di Banco Central, kier sikiera 700 miyon di florin Antiano bek.
Anteriormente, ENNIA y CBCS a logra obtene alrededor di 500 miyon florin Antiano, cual tabata para na Merrill Lynch na New York.
E deficit di solvencia a largo plaso, den parti como resultado di ‘retiro y conducta ilegal’ mester ser elimina, pero esey no ta nifica cu tin falta di likides. Segun Banco Central, ENNIA por cumpli cu tur obligacion di pago.
E procedura ta maneha den nomber di ENNIA/CBCS pa Ox & Wolf Legal Partners na Corsou, asisti pa oficina legal Hulandes y Mericano. E oficina aki anteriormente tambe a haci e trabou legal relaciona cu e fondonan na Meryl Lynch.
