Presidente di Mexico, Andrés Manuel López Obrador, diabierna pasa a respalda e decision di su gabinete di siguridad di laga den libertad Ovidio Guzman, yiu di de Joaquín ‘El Chapo’ Guzmán Loera, despues di e enfrentamento sangriento cu a registra cu Polis na Culiacan, Sinaloa.
Autoridadnan a confirma cu e enfrentamento a laga 8 morto, 16 persona herida y 49 prizonero a huy. “No por bal mas e captura di un delincuente cu e bida di personanan”, Lopez Obrador a bisa na un rueda di prensa. “E bida di hopi persona tabata den riesgo”, el a destaca.
Su posicion y actuacion gubernamental na e suceso di Culiacan a genera un polemica grandi na e pais, cu a refleha den prensa y riba rednan social, cu a yena di mensahenan contra gobierno.
Segun e version oficial, Ovidio Guzman brevemente a keda den man di elementonan di Polis y ehercito na e ciudad di Culiacan. Nan a laga Guzman den libertad despues di varios atake cu a produci na capital di estado di Sinaloa.
E yiu di ‘El Chapo’ Guzman a ser deteni pa cumpli un orden di detencion cu un Hues a dicta den su contra, como parti di un proceso pa su extradicion pa Merca. Sinembargo, despues di e captura ‘tabatin un reaccion hopi violento, a pone den riesgo e bida di hopi hende’. Pa e motibo aki a tuma e decision di libera Ovidio Guzman.
Despues di loke a sosode diahuebs pasa, e presidente a considera diabierna pasa cu su gabinete di siguridad a tuma e decision corecto di libera Ovidio Guzman, ‘pasobra tabata den riesgo hopi ser humano’.
