Ayera na mainta, durante un conferencia di prensa di Minister di Turismo, Salud y Deporte Dangui Oduber, el a papia tocante varios topico, entre nan e proyecto cu Ministerio di Deporte a cuminsa aña pasa di Hoben Activo Hoben Feliz y campaña di conscientisacion pa comunidad bira mas saludabel.
Oduber a informa riba e expansion di e proyecto Hoben Activo, Hoben Feliz cu ministerio a cuminsa como un proyecto piloto. Esaki ta basa riba stimulacion y movecion di e hobennan, un programa cu ta pa despues di scol cu y ta ofrece diferente disciplina di deporte gratis, den diferente orario y cu a resulta hopi exitoso.
El a manifesta cu despues di un reunion cu Ibisa, cu ta coopera cu e proyecto aki, nan a dicidi di expande e proyecto pa mas districto na Aruba. Den e caso aki nan lo expande pa e area di Dakota y San Nicolas, unda lo cuminsa otro siman.
Esaki ta den Plan Nacional di Prevencion di Salud cu ministerio mes a traha hunto cu PAHO (Pan American Health Organisation) y cu aña 2020 lo wordo implementa. Oduber a expresa cu esaki ta importante pa comunidad ‘enfoca riba prevencion’. Na e momentonan aki cu segun e pronostico di gastonan di AZV a bira mas halto y si comunidad no cambia e manera di biba, e fondo no lo ta sostenibel mas. Anualmente segun tur e proyeccion e gastonan medico ta keda aumenta 4%.
Di mesun manera, Oduber a expresa cu e plan aki lo bin cu campaña di conscientisacion pa brinda informacion na comunidad pa por haci mas ehercicio, pa come mas saludabel y mustra con serio e problema aki ta na Aruba; cu e 80% di su poblacion tin sobrepeso y 30% ta obeso, gastonan di pashent cu ta sufri di dialisis ta 20 miyon florin pa aña.
Esaki ta nifica, segun Oduber, cu por medio di e campañanan agresivo di conscientisacion, di duna informacion na comunidad, el a informa cu lo bay tin den oficinanan di MFA pa e comunidad por haci chekeo general gratis di sucu, presion, colesterol, entre otro, pa asina aki tin informacion di estado di salud di e hendenan, pa poco poco por cambia e estilo di bida y garantisa e sostenibilidad di fondo di AZV.
Ademas el a señala cu na otro paisnan den Caribe tin problema cu salud, no ta Aruba so cu tin e retonan aki. Tambe nan tin crisis den salud, cu nan a cuminsa pronostica caba cu si den futuro e hende no cambia e manera di biba, hopi seguro medico no por carga e peso aki door di problema di obesidad.
