Campeonato Heineken Fast Pitch femenino AA den su recta final. Aruba Bank a gana su di dos wega den e serie semi final best out of 3 y automaticamente ta pasa pa e gran final, cu lo inicia diabierna awor 7:15pm y diasabra 5pm na Pos Chikito.

Aruba Bank ta anota 3 careda den prome inning, pero mesora den bom di mesun inning Jaguars ta empata e wega. Aruba Bank ta piki 2 careda mas den cabes di 3 inning, pero Jaguars no kier entrega y ta rally pa 3 careda den bom di mesun inning, pa bay ariba 6-5. Aruba Bank ta rally pa dos careda den cabes di 4 inning y 1 mas den cabes di 6 inning pa bay ariba 8-6, pero den bom di 6 inning Jaguars no kier baha cabes ta empata e wega 8-8. Aruba Bank den parti ariba di 7 inning ta anota 2 careda mas, mientras Jaguars ta menasa den bom di 7 cu un careda, pa finalmente Aruba Bank gana cu score di 10-9.

Boxscore final.
Aruba Bank Lady Tigers 10 careda,9 hit, 1 eror y ta laga 7 coredo na base.
Jaguars Vitamin Water 9 careda, 12 hit, 5 eror y ta laga 8 coredo den circulacion.

Miho batiadonan pa Aruba Bank ta Shakeena Croes di 3-2 cu un doblete y un triple anotando 3 careda, Nikkaela Jacobs di 4-2 cu 2 triple cu dos careda anota, Carienne Bretey Rudlyn Ras ambos di 3-1, Anshellie Feliciano di 2-1.
Pa Jaguars Vitamin Water a destaca na plato Milvienne Henriquez di 3-2, Zulaika Peña 4-2 cu 2 rbi mas dos careda anota, Ludmila Geerman 4-2 cu un doblete mas 3 rbi, Rachelle Henriquez 2-1 y Kathleen Emerenciana aportando na su propio causa di 4-2.

Rudlyn Ras ta cubri henter e ruta seyando e victoria riba su nomber, enfrentando 38 batiado, tirando 37 bola, 77 strike pa un total di 114 pitch permitiendo 9 careda limpi tras di 12 hit, regalando 2 base por bola hibando asina su ekipo pa e gran final.
Kathleen Emerenciana tambe a bay completo, enfrentando 38 batiado, lansando 50 bola, 63 strike pa un total di 113 lansamento permitiendo 10 careda, di cual 6 ta limpi tras di 9 hit, regalando 3 base por bola.

Asina Aruba Bank ta elimina Jaguars den 2 wega sigui den nan serie di best out of 3 y ta inicia nan serie nobo di best out of 3 den e gran final contra Eagles diabierna awor 7:15pm na Pos Chikito. Exito na ambos ekipo den final.