Restauracion di forno di calki ta cumpliendo cu monumentenvergunning

Trabou di restauracion ta tumando luga riba e forno di calki di Rancho. Segun director di Stichting Monumenten Fonds Aruba (SMFA), Anne Witsenburg e trabou aki ta tumando luga teniendo cuenta tur regla. E intencion tras di esaki ta pa e monumento historico aki lo por aplica pa Unesco por declar’e como un patrimonio di humanidad.

Witsenburg a bisa cu SMFA ta sumamente contento di por a cuminsa cu restauracion di e forno aki cu ta un monumento icono na Rancho. El a bisa cu e forno ta un monumento y e ta keda un monumento tambe. Igualmente nan tin un monumentenvergunning y nan ta haci loke ta para den e permiso aki.

Pero mester realisa cu e forno no a wordo traha manera un cas monumental, pa ehempel e cas Ecury, unda Museo Arkeologico ta situa. Mientras cu e forno di calki ta un obheto industrial cu si algo a kibra, simplemente nan tabata drecha djis poniendo un tiki di pleister of piedra. Pero nunca den su historia e forno a haya un capa di pleister nobo. Mientras e trabou cu nan ta bin realisando den e forno ta uno necesario, ya cu si no ta wordo haci nan lo confronta cu e mesun problema di shen aña pasa cu e ta cuminsa kibra.

El a gradici tur e cursistanan cu a yuda den e prome fase di e proceso di restauracion. Despues di e dos siman cu e curso tocante con pa traha cu calki a termina, un compania di Trinidad & Tobago ta sigui cu e trabou di restauracion. Nan ta spera cu aki cuater siman e compania lo keda cla cu full e restauracion di e forno aki cu ta un monumento unico den nos region.

Igualmente den e prome fase di restauracion nan a yega di confronta algun inconveniente, ora cu e materialnan y instrumentonan uza den e trabou di restauracion a wordo horta den Rancho. Tambe nan a horta e banner poni den e sitio, por ta un hende tabatin mester di dje den e temporada di yobida aki.

E echo a crea un tiki di contratiempo, pero el a bisa cu pa SMFA no ta un rason pa nan stop di traha na beneficio di Rancho. “Si nos tur ta coopera y si nos tur keda envolvi, nos por logra algo bon pa Rancho,” Witsenburg a declara na Bon Dia Aruba.