Diabierna ta bira un dia importante pa Aruba, ora cu Conseho di Ministro di Reino mester tuma, probablemente, dos decision. Un ta encuanto e conseho di CAft pa duna Aruba un ‘aanwijzing’ pa loke ta cumplimento cu presupuesto 2019 y asuntonan relaciona.

Esaki ta encera e inclusion di e gastonan di e Plan di Crisis Social den e gastonan di personal di gobierno y cu no por surpasa e limite estableci y acorda di AFl. 479 miyon. No ta conoci con lo bay instrui pa corta gasto pa yega na e limite ey. Tambe lo mester bin claridad con e gastonan di personal ta bin bao control structural, loke ta un di kehonan di CAft cu nan no ta mira suficiente iniciativa riba e tereno aki.

Otro asunto riba cual tin conseho y comentario di CAft pa basta tempo caba ta e falta di claridad riba e plan di reforma fiscal, cu nan kier mira pa por conseha kico lo por y mester sucede den e proximo añanan pa loke ta e entradanan cu gobierno por spera. Riba esey algun tempo pasa minister encarga cu finanzas a informa Knops cu na su debido tempo lo informa esey, loke no a cay den bon tera na Den Haag, pasobra sin decision tocante e reforma fiscal, no por haci proyeccion multi-anual tampoco.

Cambio di ley LAft.
E otro asunto riba mesa ta e cambionan den e ley LAft cu a acorda den e protocol di november 2018 . Gobierno a manda un propuesta di ley pa Staten cual a keda trata na juni ultimo. Sin embargo, despues di e amiendanan cu e fraccionnan gubernamental a haci den e propuesta prome cu nan a aproba esaki, e asunto a pega, y gobierno a dicidi di wanta e ley aproba y no mand’e pa Gobernador ratifica. Gobierno Hulandes no ta acepta esaki y ta exigi cu e acuerdo den e Protocol ta keda formalisa den ley adecuadamente. Kico ta e alternativanan cu gobierno di Aruba tin pa regla e asunto aki?

  1. Por anuncia na Staten cu, en vista di e cambionan drastico haci den e propuesta di ley di gobierno, ta dicidi di revoca e propuesta, pasobra gobierno no ta ‘reconoce’ su propuesta mas den e ley modifica cu amienda. Si esey sucede, e ta significa final di e propuesta di ley aproba. E alternativa aki ta poco probable, aunke e lo yuda pa convence Hulanda cu e ley ta ‘for di mesa’;
  2. Por manda un propuesta nobo pa Staten, cu atrobe ta contene solamente e cambionan acorda den e Protocol, cu un entendimento (politico) cu no ta haci amienda riba esaki cu ta perturba e acuerdonan haci pa gobierno di Aruba den e Protocol di november 2018. E alternativa aki tambe ta poco probable;
  3. Gobierno por manda e propuesta di ley aproba pa Gobernador pa ratifica. Por ta cu Gobernador ta haya instruccion pa no firma e ley, o e mes por haya cu e no por firma. Den ambos caso ta cuminsa e proceso segun articulo 21 di e Reglamento pa Gobernador (un ley di Reino) cu ta stipula cu mester notifica e Rey di biaha y seguidamente e propuesta di ley aproba ta bay pa Raad van State pa evaluacion y conseho na Rey. E alternativa aki ta parce poco probable tambe;
  4. Gobierno di Aruba ta notifica Conseho di Ministro di Reino cu nan no ta mira algun accion legislativo factible na Aruba y ta pone e decision den man di e Conseho di Ministro di Reino pa dicidi kico mester sucede, si e Conseho ta haya cu supervison financiero pa Aruba mester continua. Den e caso aki por sucede dos cos:
  5. Conseho di Ministro di Reino ta haya cu no mester tin supervision financiero mas riba Aruba, o no den e forma actual, en todo caso;
  6. Conseho di Ministro di Reino ta haya cu si mester continua cu supervision financiero riba Aruba, y ta contempla e posibilidadnan pa continua esaki. E unico opcion viable ta e imposicion di un ley di Reino (Rijkswet), cu basicamente tin e mesun contenido cu e ley LAft y e ley di Reino di supervision pa Curaçao y Sint Maarten.

Alternativa 4a ta poco probable, ya cu varios expresion di gobierno Hulandes ta indica lo contrario. Ademas, laga Aruba sin supervision no ta kita responsabilidad di Reino pa bon gobernacion, tambe bon administracion financiero, y ta pone e situacion unda el a cuminsa naa 2014. Por lo tanto e unico alternativa, si no por regla e supervision mas den un ley di Aruba, ta continua supervision den un ley di Reino. E decision ey por cay diabierna venidero tambe.