Cu un carta tambe fecha 7 di october 2019 Prome Minister Evelyn Wever-Croes ta laga Prome Minister Hulandes, Mark Rutte, sa cu e no ta di acuerdo cu e intencion y base di e ‘aanwijzing’ cu CAft a propone na Conseho di Ministro di Reino. Segun su opinion, no ta duna merito, of no suficiente, na e esfuersonan haci na banda di Aruba.
Tambe cu aparentemente CAft ta tuma como punto di salida un cuadro di referenca amplio cu no ta completamente conforme loke e ley LAft ta stipula y ta propone pasonan siguiente cu actualmente ta prematuro y cu no tabata someti ainda na ‘hoor en wederhoor’.
Tambe e mandatario ta indica cu CAft ta duna un conseho pa bin cu un ‘aanwijzing’ mientras den e mesun conseho ey ta anticipa cu a base di e segundo reportahe ta anticipa cu Aruba lo cumpli cu e norma acorda y cu e saldo di financiamento pa 2019. Wever-Croes ta mustra cu CAft ta enfatisa e importancia principalmente “mirando atras.” E mandatario ta haya cu na lugar di esaki “mester wak dilanti y a base di e observacionnan positivo di CAft mes, sigui e linea aki pa futuro y mester evalua sostenibilidad di finanzas di Aruba riba su propio merito.” Ta añadi tambe cu alcansa finanzas publico sostenible no ta algo cu ta sucede den cuatro aña, sigur si ta trata di adaptacion structural. Den un resumen di e gastonan di personal di ultimo añanan e Prome Minister ta mustra cu por mira cu na 2019 e corelacion debe/GDP lo ta mes halto cu na 2015: 75%. (Esaki cu e cifranan adapta di GDP segun e reciente calculacionnan di CBS; red.).
Pa loke ta e gastonan di personal, e punto mas cayente den e asunto financiero pa 2019, ta argumenta cu ta acusa Aruba inhustamente di cu no ta duna atencion, o no suficiente, na problema structural. Ta bisa cu den e prome añanan despues di institucion di CAft, esey tampoco tabata e caso, pero cu e presupuestonan si tabata haya aprobacion di CAft. E mandatario ta haya cu bao di e situacion precario actual, e no ta mira pakico esey lo mester ta diferente. Tambe e ta señala cu a traves di e implementacion di e Plan pa Reduci Gasto di Personal (Beleidsplan Verlaging Personeelslasten; BVP) por a identifica e esencia di e problema. “E problema cu cual e Pais ta lidia pa hopi aña caba ta relaciona cu mester por proyecta e crecemento di e gastonan di personal bon.” Ta añadi tambe cu CAft no kier a duna conseho riba e BVP y cu asina mes a pidi CAft pa ta involucra den e proceso di mehora e planificacion di gasto di personal.
Finalmente, ta haya cu no tin base pa un conseho di ‘aanwijzing’ valido, y cu ta honra e acuerdonan haci di banda di Aruba y cu CAft lo por hunga un papel importante si nan ta evalua segun e cuadro normativo, ta duna conseho tecnico y mustrando mas comprension pa e ‘contexto legal’.
