Parlamentario Edgard Vrolijk (MEP): ‘Cada bes pueblo ta haya mas sorpresa di ex-minister y ex-parlamentario di AVP’

Caso Avestruz tin hopi hende nervioso entre otro ex parlamentario Melvin Tromp kende pa trata na desvia atencion di pueblo ta purba atacha imagen di hendenan cu ta trahando cu alma y cuerpo pa drecha e situacion financiero, social, economico di pais Aruba. Y sin lubida e ola di berguensa cu AVP y su ex ministernan y ex parlamentarionan a laga atras cu yen di casonan di corupcion, mal uzo di poder y falsedad di papelnan.

Melvin Tromp tambe a uza e formula di caso Avestruz.
Ex parlamentario Melvin tambe ta forma parti di mesun modus operandi y di cual awe ex Minister Benny Sevinger ta e sospechoso principal. Unda cu su persona ta haya un tereno erfpacht den zonanan privilegia pasando dilanti tur ciudadano y despues ta cambia e destinacion di esaki pa uno comercial y pa bende esaki como tereno comercial. Den cuadro di transparencia manera cu Tromp ta pretende di hiba un debate lo ta bon pa e bin dilanti y splica pueblo si no ta berdad cu el a cambia e destinacion di un tereno privilegia cu el a haya como erfpacht pa traha cas pa uno comercial, y lo ta bon pa e bin dilanti y duna cuenta na pueblo di e suma cu su persona a ricibi pa benta di e tereno comercial aki. Y sigur como ex parlamentario bo ta mara na hopi exigencia na tur instancia y ta bon pa e bin splica pueblo con por ta cu Sevinger mesun dia cu e papel ta bay DIP ya ta firma cu ta di acuerdo. Y esaki ta un di e tanto casonan di abuso di tereno cu ta patrimonio di pueblo pa enrikece un grupo entre otro Tromp.

Mike Eman, un lider cu a permiti tur bagamunderia.
Cada bes pueblo ta haya mas y mas sorpresa cu Mike Eman como lider a permiti y tolera tur tipo di actonan di su ex ministernan y ex parlamentarionan durante su gobernacion. Nos a conoce caso di Richard Arends cu a bira un miyonario den corto tempo y awo pueblo ta topa caso di Tromp cu tambe a enrikece su mes riba custia di pueblo. Y si ta e caminda di tilda nos coleganan y purba atacha nan imagen Tromp kier bay, anto e ora e box di pandora lo habri pa mustra pueblo cuanto mas a haya tereno den un dia y cuanto mas di e ex parlamentarionan, famianan hopi pega a haya y tin te ainda contractonan lucrativo den varios NV’s di Aruba. Pues awe pueblo un biaha mas ta wak cu AVP ta nada mas cu un cartel di crimen organisa unda cu haciendo mal uzo di nan poder durante gobernacion a sa di enrikece tur nan miembronan y sponsornan mientras cu abo pueblo a keda cu tur debe, problemanan social, financiero y economico di e pais aki y tin di bay paga cu orguyo tur debe crea door di Mike Eman y su set di avestruznan.