Citgo: Solamente a suspende e contract ‘te ora cos drecha’ na Venezuela

Mientras gobierno di Aruba a anuncia extensamente e siman aki cu a logra un Memorandum of Understanding (MOU) cu CITGO, den cual Aruba ta haya yabi di e refineria y ta sigui negocia e otro aspectonan cu falta pa termina e convenio di 2016, Citgo tin riba su website un mensahe cu ta tira otro luz riba e asunto. E texto integral riba e website citgo.com ta como lo siguiente.

Citgo Aruba Holding y Aruba ta acorda un suspension temporal di e contract mientras condicionnan na Venezuela drecha

Houston, October 9, 2019 – CITGO Aruba Holding, un subsidiario di PDV Holding, Inc., a yega na un acuerdo diaranson cu Gobierno di Aruba pa temporalmente suspende nan contract pa e rehabilitacion y operacion di e refineria di petroleo na San Nicolas riba e isla Caribense.

Di acuerdo cu un portavoz di e compania, “E operacion di e Terminal lo ser transferi temporalmente pa Gobierno di Aruba. Lo reanuda e contract unavez tin un transicion democratico den proceso na Venezuela.” E portavoz a añadi tambe cu CITGO Aruba Holding “lo atende su obligacionnan cu empleado y proveedornan durante henter e proceso di e transferencia di operacion di e Terminal.”

Den prensa internacional orienta riba energia manera Reuters a sali noticia mas dirigi riba loke gobierno di Aruba a vocifera y loke prensa local tambe a haya di tende, banda e posicion di Citgo tambe.

(Reuters – 09 di october) – Aruba diarason a yega na un acuerdo cu Citgo Petroleum Corp, cu base na Merca, pa termina nan contract pa rehabilita y opera e refineria di e isla, un declaracion di prome minister di e isla a bisa.

E nacion Caribense ta planea pa busca candidatonan externo pa tuma e refineria di 209.000 bari pa dia over, Prome Minister Evelyn Wever-Croes a bisa. E refineria tabata inoperativo debi na sancionnan Mericano riba propietario di Citgo, empresa petrolero estatal Venezolano Pdvsa.

“A tuma hopi tempo, hopi esfuerso y hopi energia, pero finalmente Citgo a admiti cu e no tin capacidad pa cumpli cu e acuerdo,” Wever-Croes a bisa den un declaracion.

Reuters ta menciona tambe e declaracion di Citgo, cu ta suspende temporalmente e contract “te ora tin un transicion democratico andando na Venezuela.” Tambe Reuters ta señala cu e portavoz a nenga di duna mas detaye di e asunto.

Nota di redaccion:
Ta importante pa bin un splicacion adecuado di e asunto aki. Si Citgo tin razon y ta existi solamente un acuerdo pa suspende e contract, y cu for di nan declaracion por conclui cu nan tin pensa di sigui cu e contract ora ‘cos drecha’ na Venezuela, anto no ta posible pa gobierno di Aruba bay busca otro operador, pasobra nan ta mara ainda na e contract. Tambe lo ta bon pa trece claridad na kico e termino “Terminal” ta referi den e mensahe di Citgo. Ta referi na e terminal di crudo, o ta referi na henter e propiedad incluyendo terminal y refineria. Ta di spera cu gobierno di Aruba tin aclaracion pa e aparente contradiccion aki.