Pa via cu supermercadonan na Sint Maarten ta mucho caro, un grupo di pensionado y sindicato cu a forma e Sint Maarten Consumers Coalition a dicidi di importa fruta y berdura di Santo Domingo riba prijs di e costo. Nan ta organisa un mercado unda miembronan por cumpra fruta y berdura pa prijs substancialmente abou compara cu supermercadonan.
E coalicion di consumido cu ta organisa e mercado aki, cual awo ta bayendo pa su di 2 evento, ta yama su mes e ‘plataforma anti pobresa’. E ta un iniciativa di Seniors and Pensioners Association y 7 sindicato di trahado na Sint Maarten. Raymond Jessurun ta un di e fundadonan di e coalicion.
Come saludabel ta un reto riba e isla, claramente pasobra mayoria fruta y berdura ta importa, mescos aki na Aruba, cual tampoco tin mucho iniciativanan di agricultura local, mescos cu Sint Maarten. E coalicion no ta haci ganashi riba loke nan ta bende, pa cual Jessurun a indica cu no por consider’e un mercado como tal.
