Tur aña Arubahuis ta informa riba e importancia pa futuro studiantenan cu kier bin studia na Hulanda pa tuma accion na tempo pa regla e asunto di vivienda. E studiante cu tin pensa di bay studia na Hulanda mester tene cuenta cu mester inscribi pa camber sigur un of dos aña di antemano, dependiendo e ciudad.

Arubahuis ta keda enfatisa riba e importancia di regla vivienda na tempo mirando e scarsedad grandi cu tin den diferente ciudad. Mas tempran bo orienta y inscribi, mas grandi bo chensnan ta pa haya un luga di biba ora cu bo bin studia na Hulanda. Arubahuis hunto cu e mentornan tin e tarea pa duna e informacion y conseho necesario con por yega na vivienda. Nos ta enfatisa cu e studiante mes ta keda responsabel pa haya y regla su vivienda na Hulanda.

Kico ta e stapnan cu bo mester tuma:
 1.Orienta riba e opcionnan di vivienda cu tin na e ciudad(nan) / scol(nan) unda bo lo kier bay studia

2.Tuma bon nota di e procedura, reglanan y deadlines di cada opcion

3.Tuma accion y inscribi na e instancianan cu ta ofrece vivienda pa studiante. Ta consehabel pa inscribi na mas cu un instancia.

4.Si bo no a scoge un ciudad ainda ta consehabel pa inscribi pa vivienda na mas cu un ciudad.

5.Keda monitor bo inscripcion. E studiante ta responsabel pa keda controla su inscripcion y reacciona riba vivienda.

Kico ta e opcionnan di vivienda pa studiante na Hulanda?

1.Acomodacion pa studiante via di “Woningcorporatie.”
Arubahuis ta conseha tur studiante for di Aruba pa semper inscribi na un “woningcorporatie” cu ta ofrece acomodacion pa studiante. Na cada ciudad tin un of mas woningcorporatie. Bo por inscribi facilmente online via di e varios websites. Mayoria ta pidi un suma chikito pa e inscripcion. Via di un woningcorporatie bo por bin na remarke pa un camber of studio cu ta pagabel y a base di un contract cu ta confiabel. Pa cualifica pa un vivienda bo mester acumula tempo di inscripcion. Mas tempo bo tin inscribi, mas chens bo tin pa haya un vivienda. Awendia na mayoria ciudad bo mester ta un por medio di dos aña inscribi na un woningcorporatie pa por bin na remarca pa vivienda. Tin algun woningcorporatie tin acomodacion y/of areglo special pa studiantenan di prome aña unda cu ta aplica otro regla y deadlines. Tambe tin corporaties cu ta aplica un areglo preferencial pa studiantenan internacional. Informa bon riba e website di e woningcorporatie si tin un areglo special pa studiantenan di prome aña of si bo ta cualifica pa e areglo pa studiantenan internacional.

2.Acomodacion pa studiante via di scol.
Tin varios HBO y Universiteit na Hulanda cu ta ofrece vivienda pa studiantenan cu ta bin di afo. E facilidad aki ta specialmente pa studiantenan internacional y den mayoria caso e ta pa un temporada defini di 6 luna of 1 aña. E meta ta pa facilita e studiante nobo cu vivienda pa e prome periodo di estudio. Den caso cu un scol tin opcion di vivienda e informacion aki ta poni riba nan website bou di “housing”of “accomodation”. Mayoria scol cu ta ofrece e opcion aki ta ofrece camber of studio muebla. E ta hopi importante pa studiantenan cu ta considera e opcion aki pa tuma bon nota na tempo di e reglanan y deadlines. Mester check cu e scol si como studiante di Aruba bo ta cualifica pa haya vivienda via di scol. Pa studiantenan di Aruba y Antias esaki ta depende di e maneho di e scol.

 

3.Acomodacion via di “makelaar” of “bemiddelingsbureau’s.”
Otro opcion cu studiante y mayornan sa considera ta un makelaar of bemiddelingsbureau cu por intermedia pa haya un vivienda den e sector comercial. Arubahuis ta accentua cu makelaars y bemiddelingsbureau’s ta opera riba e mercado comercial y door di esaki e gastonan ta mas halto compara cu e otro opcionnan menciona. Apart di e prijsnan mas halto un exigencia adicional ta cu mayoria ta exigi mayornan of un persona cu un entrada na Hulanda pa para garantia pa e studiante. E experencia cu makelaars ta varia hopi den cada regio y e ta dificil pa recomenda of duna referencia mirando cu nan ta keda instancianan comercial. Arubahuis tin contacto y experencia cu algun organisacion den algun regio pero Arubahuis no por para responsabel pa e servicio y condicionnan.

4. Acomodacion via “particuliere aanbieder.”
Tin varios persona particulier cu ta ofrece acomodacion riba websites y social media of via di advertencianan den supermercado. Facebook ta conoci pa tin diferente pagina unda cu hende por ofrece vivienda na interesadonan. Aunke esaki ta un opcion real pa varios studiante e tin su risico door cu esaki no ta wordo regula of controla. Lastimamente tin varios hende den e mercado aki cu ta haci mal uzo di e situacion y ta estafa studiantenan for di exterior unda cu e studiante por perde hopi placa. Ta alerto, pidi conseho y controla tur cos prome cu firma of pasa placa.

5.Acomodacion via di famia, conoci of amistad.
Tin varios studiante cu tin famia, conoci of amistadnan na Hulanda cu por ofrece vivienda sea temporal of pa tempo mas largo. E ta importante pa haci bon palabracion riba e condicionnan y preferibel pa tin tur cos riba papel pa evita problema den futuro. Un punto hopi importante ta pa verifica cu e familiar of conoci si ta duna permiso pa inscribi na e adres na Gemeente. Sin e posibilidad di inscripcion na e adres bo no por establece bo mes oficialmente na Hulanda.

Expectativanan y importancia di vivienda.
Ora di busca vivienda ta importante pa bo balansa bo expectativanan y pa bo tin e “mind-set” corecto pa loke ta biba na Hulanda. Cuminsa simpel y chikito y zorg pa bo haal bo prome aña di estudio. E aña siguiente ya bo conoce Hulanda mas miho y bo por orienta pa algo otro teniendo cuenta cu bo budget. Mayoria studiante for di Aruba kier un studio cu tur facilidad pa nan mes pero mester realisa cu e tipo di studionan aki ta scars y mas caro compara cu un camber. Tene cuenta cu ora bo yega Hulanda bo mester por inscribi na un adres mesora. Sin vivienda bo no por inscribi na Gemeente y bo no por haya bo BSN-nummer. Pa ley bo mester ta inscribi na yegada na Hulanda den e Basis Registratie Persoonsgegevens (BRP) door cu bo a schrijf uit for di Aruba. Sin un adres na Hulanda y sin BSN-nummer tur resto di asunto cu bo tin cu regla prome cu aña escolar cuminsa ta keda pega. Por ehempel habri cuenta di Banco, DUO, OV- studentenreiskaart, scol etc.

Informacion di cada ciudad/regio.
Den transcurso di e simannan nos dilanti Arubahuis hunto cu e mentornan lo publica informacion specifico di vivienda di cada regio na Hulanda. E informacion lo wordo publica den medionan local y riba e Facebookpage “Onderwijszaken Arubahuis”. Tambe por haya tur e informacion bek riba e website di Departamento di Enseñansa di Aruba www.ea.aw riba e pagina special “Studia na Hulanda”. Tin hopi asunto cu ta depende di bo preparacion pa bin Hulanda. E conseho ta pa no warda y cuminsa awo. Arubahuis ta desea tur futuro studiante hopi exito cu nan preparacion!