Despues di algun dia di turbulencia fuerte recientemente, ta parce cu atrobe tur cos a calma na hospital. Esey di berdad ta asina? O bao di superficie e candela ta warda pa lanta atrobe, na e proximo ocasion? Bon Dia Aruba tabatin un entrevista cu dr. Jaime Falcono, conocido medico specialista y pa un tempo tambe director di Hospital Horacio Oduber.
Actualmente ‘pensiona’ pero hopi activo ainda, cu entre otro un Facebookpage hopi bishita, Bon Dia tabata interesa den su opinion con e ta mira e ultimo acontecimentonan.
JF: “Ta dificil pa cualkier persona bisa cu cos ta bayendo bon, y e instancianan envolvi ta coopera bon cu otro. Nos por a tende comentario di SOGA cu a indica cu desde 2014 tabata sinta tur siman cu otro na mesa pa discuti e problemanan cu tabatin, relaciona cu e tarea no facil pa opera un hospital mientras ta haci renobacion plus un parti nobo. No tin hopi hende cu tin e experiencia amplio den construccion di un hospital na Aruba y ey ta unda cu hospital mester a forma un team di trahador di hospital pa prepara y yuda mitiga e problemanan cu por a surgi den construccion. Un tarea cu su retonan grandi. Mi a comprende cu e incidente reciente di e lekkage parce di ta ocasiona pa falta di mantenimento riba e sistema di afwatering, pero hospital so ta responsable? Segun declaracion di presidente di sindicato tabatin tambe deficiencia den e parti nobo. Ta vale la pena menciona cu por ta no a tene cuenta te awe cu e situacion dificil cu Hospital tin cu awa desde su inicio. Awa a yobe den e dianan aki y kico bo ta mira? Un plas enorme di awa para pazuid di hospital cu tur su consecuencia pa sangura, etc. E problema ta cu a traha e hospital den un tereno no apto, esta den un antiguo saliña. Esey ta haci cu semper saca awa hiba otro lugar ta keda un desafio. Esey tabata e problema cu a keda señala atrobe tempo cu a tuma e decision pa renoba y amplia na e mesun lugar aki.”
Pregunta BDA: Pero ta asina dificil pa stipula responsabilidad di cada ken den esaki; hospital di un banda como inquilino y SOGA como propietario?
JF: “Manera bisa caba, nan a sinta cinco aña tur siman y no por a yega na un cooperacion efectivo. Esaki a bira obvio despues cu e problema cu e inundacion a resulta den un ‘blame game’ y no un muestra di cooperacion. Lo por conclui e ora cu lo mester a reina un ambiente di desconfiansa. Mi ta puntra mi mes si retiro di Theo de Kool, e director financiero, lo por a hunga un rol den esaki. De Kool tabata un persona cauteloso y hopi critico, cualidadnan necesario den e tipo di proyecto aki. Por ta cu despues di su salida comunicacion y coordinacion a bay atras, unda ta parce cu ta reacciona solamente riba incidente segun nan ta tuma lugar.
Pero tin otronan cu tambe tin responsabilidad den esaki. Nos ta tende di SOGA atrobe cu ultimo dos luna no tabatin reunion di coordinacion pasobra e representante di gobierno no a aparece. Otro indicacion cu e maneho general no tabatin prioridad y na unda tur ta mustra dede riba otro y ningun ta asumi nan responsabilidad. Loke ta keda falta ta e experticio specialisa cu mester pa duna guia na un proyecto asina complica manera esaki.
BDA: Ban trata otro tema awor. Unda hospital mester bay? Ta bisa cu tin menos cama, mientras Aruba ta creciendo den poblacion, loke ta causa bastante comentario negativo si no tin splicacion; pero nos tin solucion?
JF: Ban analisa e situacion di varios aña atras, cu no a haya solucion ainda. Laga mi duna un ehemplo. Mi a comprende cu sigur 70% di e pacientnan tin 65 aña o mas. No ta parce mi ilogico si nos tene cuenta cu embehecimento na Aruba ta tuma lugar na un forma acelera y e estado di salud di nos pueblo ta laga hopi di desea. Si e cuido geriatrico na hospital sigui aumenta, esey lo significa cu lo sobra poco lugar pa atende e resto di adulto cu tambe mester di cuido.
Un posible solucion ta aumenta e facilidadnan diagnostico. Tecnologia nobo ta haci posible pa bo trata mas pacient ‘poliklinisch’ na lugar di interna nan den hospital. Bo mester inverti den un Eerste Hulp y departamento diagnostico (funtiekamers) bon ekipa cu e tecnologia y personal specialisa pa bo por haci e cambio ey. Esey ta yuda bo baha gasto a lo largo y ta duna bo e posibilidad pa reserva capacidad di cama pa esnan cu realmente mester di internacion y e cuido corespondiente. Solamente asina bo ta evita cu mester hopi mas cama den Hospital.
Loke ta falta na Hospital, y no awor so, ta e diligencia pa tuma decision y ehecuta esakinan tambe. Si no haci esaki, no tin resultado y e gastonan ta sigui crece.
