E luna aki a cuminsa oficialmente cu e proceso di introduccion di e plataforma digital den Departamento di Infrastructura y Planificacion (DIP).
Segun Minister di Infrastructura, Otmar Oduber, e cambio aki ta trece un reto cune, pero e ta cuestion di mentalidad pa nan por custumbra cu e cambio aki di documento fisico pa digital. Pero e ta sigur cu e cambio di mentalidad aki ta bay cana hopi bon den e dianan nos dilanti.
“Na final di dia e servicio pa comunidad ta loke nos kier mehora,” el a bisa. El a bisa cu e inversion tabata menos cu 1 miyon florin, ya cu den pasado inversion a wordo haci riba e parti di ekipo cu a facilita cu e inversion a bira mucho menos di loke normalmente ta.
Oduber a indica cu apenas e proceso di digitalisacion ta canando. E ta practicamente un proyecto piloto pa e e-government cu Gabinete Wever-Croes kier introduci den aparato gubernamental. Actualmente e digitalisacion di DIP ta internamente. Pero pa luna di december DIP tin plania di brinda su servicio externamente pa comunidad por diligencia cualkier solicitud di forma digital.
Oduber a sigura cu eficiencia ta bay ta hopi mas grandi di loke e ta na e momento aki, y esaki lo wordo refleha den productividad. Tin cierto preocupacion cu e digitalisacion aki lo trece cu ne cu lo tin hendenan cu no lo tin nada mas pa haci. Pero e mandatario a bisa cu gobierno tin otro tareanan, y niun hende mester ta nervioso, ya cu en bes cu gobierno ta bay tuma hende nobo den servicio, nan ta duna capacitacion na nan personal pa nan por bay haci otro tareanan importante pa gobierno.
Segun e mandatario, den e proceso aki e director di departamento por tin un bista general entre otro, unda e documento digital a keda drumi mucho hopi. E ta haci e proceso aki mas diligente, ya cu e sistema mes ta pone pa traha 5 dia riba e documento y despues di e termino aki e sistema mes ta manda un señal, unda bo ta haya 5 dia mas, y si periodo di 10 dia e ta saca un bandera cora cu ta bay pa e director tambe.
Esaki ta haci cu e director por tin un bista di e situacion y dicon a surgi y e ta dicidi si ta duna e persona mas tempo si of no. Of pone den man di otro persona cu por atende cu ne mas miho. Pero no solo e director, sino e mesun minister tambe por tin acceso pa sa e cantidad di documento cu ta up date of cuanto di nan ta stanca. Pues esaki lo permiti pa maneha e departamento aki di un forma mas eficiente.
