Despues di trata ley di Serlimar den prome tanda; Pregunta cu a keda pa contesta

E tratamento di e proyecto di ley di Serlimar a duna claridad en todo caso di e duda y incertidumbre cu tabata existi ainda riba e proyecto. E postergacion te dia 15 di e luna aki, irespecto e motibo pa cual a dicidi di pospone, lo por sirbi pa e mandatario concerni y e fraccionnan cu ta sostene gobierno, yega mas cerca otro. Den un entrevista telefonico cu parlamentario Daphne Lejuez di e fraccion di MEP, a repasa algun di e aspectonan cu a discuti den e reunion y cu e ta considera di importancia pa haya un contesta satisfactorio riba nan.

Un di e cosnan cu sigur Lejuez lo desea di mira aclarea, ta e asunto di e ‘incinerator’ fuera di e ley aki. E aspecto aki a bin ampliamente dilanti den e debate, cu diferente orador enfatisando cu e cambio di ley no tin nada di haci cu e asunto di ‘incinerator’ pero manera Bon Dia Aruba a señala den nos edicion di ayera, bao articulo 1, punto c ta defini como elemento di ‘beheer van afval‘ tambe e aceptacion di desperdicio destina pa kima den un forno grandi pa kima (desperdicio). Y no por tin confusion cu e fornonan chikito pa otro material pasobra esakinan ta menciona explicitamente den articulo 1, punto b.

Aki claramente ta haci e escogencia pa un incinerator den un ley cu supuestamente no tin nada di haci cu esey, cu mas bien lo mester garantisa cu tin un framework sano y balansa pa e compania estatal por funciona aden.

Lejuez: “Corecto, e punto ey (di e incinerator) lo mester bay. E ley aki ta pa crea un bon cuadro pa Serlimar por traha, pero teniendo debido cuenta cu un ‘level playing field’ pa otronan den e sector. E debate tocante un incinerator si of no nos ta hiba dia bin cu esey den un proposicion na parlamento. Ningun hende ta cuestiona e derecho di existencia di Serlimar, pero no mester crea situacion desbentahoso pa otronan. Cu e cambio di e tarifa a drecha esey caba, pero nos no t’ey ainda. Por ehemplo, mester kita e definicion di Serlimar como ‘unico’ cu ta encarga cu maneho y supervision di desperdicio. Ta dificil pa combina tarea di supervision di e sector cu participacion den un competencia comercial den un level playing field cu e otronan.”

Tambe Lejuez a enfatisa cu el a pidi e mandatario si e ta dispone di estudio socio-economico cu ta substancia y hustifica e tarifanan cu tin pensa di cobra, y ki efecto riba economia esakinan por tin. Tambe e punto cu no a atende ainda, y esey ta cu realmente ta trahando ‘pa robes’ den e sentido cu no tin ningun ley pa defini desperdicio, un ‘Afvalstoffenverordening’.
“Nos ta definiendo trabao di Serlimar sin cu tin e ley general pa crea e framework adecua pa maneho di desperdicio en general, y banda di esaki tin e ley aki, pa regula nan trabao.”