Durante su delaster conferencia di prensa, Minister di Asunto Economico y Finansa, Xiomara Maduro a referi na e contenido di e carta cu e organo di supervision financiero CAft a manda pa Conseho di Minister di Reino, caminda nan ta pidi pa duna un aanwijzing (instruccion) na gobierno di Aruba.
Den e carta cu e organo aki a manda tambe pa Parlamento di Aruba, nan ta bisa cu e finansa di Pais Aruba, y locual ta e maneho financiero di nos pais, no ta den orden. Igualmente el a referi riba e puntonan caminda CAft ta indica cu gobierno no a bin cu medidanan pa baha gastonan structuralmente y mas bien nan a bin cu entradanan incidental y no structural.
Gastonan y entrada incidental.
Segun e mandatario, tur hende sa tocante e situacion financiero di nos pais, sino Aruba no tabata bou un supervision financiero. Pues tur hende sa cu e situacion di finansa publico for di hopi tempo no ta bon. Tambe CAft a indica den su carta cu gobierno no ta tumando suficiente medidanan pa asina por drecha e situacion pa haci’e uno manehabel, debi cu gobierno no ta atendiendo cu e asunto di gasto di personal.
Den e punto aki, Caft ta haci enfasis riba locual ta entradanan incidental. CAft ta haya cu e debe di Aruba ta creciendo innecesariamente. Tambe tin diferente riesgo di cual e organo di supervision no ta mira cu gobierno ta haciendo suficiente pa atende cu nan.
Pa e mandatario ta claro ora CAft ta papia di entrada incidental. Ruiz-Maduro ta haya cu pais Aruba no ta haya tempo pa por pensa riba solucionnan factibel. Pero di otro banda, si pais Aruba no ta haya espacio pa asina por implementa e cambionan necesario, ‘con bo por bay over riba algo structural’, el a bisa.
Si gobierno no ta haya tempo ni espacio, Ruiz-Maduro ta kere cu nos ta keda, manera ta wordo bisa, den e circulo vicioso di bay busca cosnan incidental pa por yega cumpli cu e norma. El a trece cu preocupacion cu e tipo di situacion aki ta pone cu e hendenan ta traha den un situacion irealistico, cu no ta compatibel cu e realidad. No ta esey -segun e mandatario- loke a pasa tur e añanan desde 2015 bou e supervision di CAft. El a argumenta cu e echo aki a haci cu e debe di pais Aruba, bou e wowo di CAft, a crece te caminda cu el a bay.
Encuanto e remarca di CAft cu e debe a bira mas grandi, el a bisa cu ta mas cu claro, pero e no ta di awor, sino cu bou e supervision di CAft tambe, esey a yega di pasa den gobierno anterior. Mientras cu e gobierno actual ta bin trahando riba stabilisacion di e debe aki. Nan no a bin cu deficit grandi di cual gobierno tin cu fia cantidad di placa den exterior, locual ta subi e debe nacional.
