Eleccion parlamentario nobo pa St. Maarten awo a keda poni pa diahuebs, dia 9 di januari 2020, y e disolucion di Parlamento lo ta efectivo for di dialuna, 10 di februari 2020. Esaki segun un decreto cu amienda cu ta drenta den efecto inmediato.
Gobernador Eugene Holiday a haci e anuncio den un comunicado di prensa ayera tardi, den cual tambe a pidi pa stapnan inmediato pa introduci reforma electoral. Holiday a bisa cu ayera el a ricibi un draft di decreto nacional for di Conseho di Minister regulando e amienda di e decreto di dia 23 di september ultimo, pa disolve parlamento y yama eleccion trempan. “Esaki ta e resultado di e decision di e miembronan di Bureau Central di Votacion, mirando nan preocupacion expresa, pa pone nan puesto disponibel via carta dia 1 di october 2019.”
Holiday a bisa cu dentro di Reino Hulandes tin un principio democratico basico, cu unabes yama eleccion, no por revoca esaki. Un decreto yamando pa eleccion y disolve Parlamento dentro di e tres luna prescribi constitucionalmente por unicamente haya amienda bou circunstancianan excepcional. “Cu retiro di e Bureau Central di Votacion haciendo imposibel pa organisa eleccion dentro di e tempo stipula pa e decreto di dia 23 di september 2019, a presenta un circunstancia excepcional. Gobernador, despues di evalua e draft cu amienda di decreto nacional y tumando e circunstancianan nobo den consideracion, a firma e decreto nacional cu ta yama pa postulacion diahuebs dia 21 di november 2019, eleccion trempan diahuebs dia 9 di januari 2020, y disolucion di parlamento dialuna dia 10 di februari 2020”, Holiday a bisa den su declaracion.
