Awe lo dicidi den Parlamento encuanto e ley di Serlimar. Director di Serlimar, Henley Davelaar a amplia mas riba e tema aki, pa “aclara e duda den comunidad” cu no ta trata di un ley nobo, sino un adaptacion di ley existente.

Segun Davelaar loke ta importante den e cambio di ley di Serlimar ta e calidad di servicio cu nan lo por brinda pueblo di Aruba como compania estatal, a traves di e cambio aki. “Pa locual nos kier duna, ta importante pa nos tin e sosten necesario di pueblo.”

E ta bisa cu mester sosten di pueblo pa por haya fondo necesario pa sigui den operacion stabiel y garantisa cu por tin un medio ambiente limpi cu tur hende por biba den aden. “Esey ta e motibo principal y fundamental pa cual e ley ta importante pa nos.”

Davelaar a agrega cu manera den pasado, Serlimar lo sigui como unico instituto cu ta encarga cu ‘procesa y maneha’ desperdicio. Esey ta importante pa motibo cu e proceso aki ta trece gasto cune. Tambe el a bisa cu e ley ta duna tur compania priva e posibilidad di recoge sushi.

E ta bisa cu henter e proceso no ta solamente recoge sushi na cas, pero ta e manera con lo procesa e desperdicio despues. “Henter un proceso di operacion pa por traha na un manera limpi. Tin ekipo di mantencion, truck, renobacion cada 5 aña. E upcycle center unda cu pueblo por yega cerca nos di forma gratuito y contribui economia circular treciendo cierto tipo di desperdicio cu ta recycle; esey tambe ta importante.”

Henter e pakete di proyecto di mantencion di bario, di fundacion, scol, pa mantene tur area rond Aruba limpi, e area turistico, cu Serlimar mester percura p’e, tarea cu segun Davelaar otro compania no ta haci, pasobra ta Serlimar tin e convenio cu gobierno. Sinembargo ta keda tarea pa compania grandi y chikito cu ta responsabel pa desperdicio cu Aruba ta produci. Pero pa no trece confusion, no ta bay kita compania priva di opera, solamente e parti di beheer ta cay bao Serlimar.

Segun compania priva, ta bisa cu Serlimar ta haya subsidio di gobierno. Davelaar ta bisa cu no ta haya subsidio, sino un ‘vergoeding’ pa e trabao extra cu ta haci, manera piki bestia morto riba caya, un “trabao fuerte cu ta haci.”

“No ta ‘zomaar’ ta ricibi, nos ta compromete nos mes pa haci e trabao. Awor, si kier handle e problema di un manera responsabel, mester atende desperdicio bon, pa keda cu un medio ambiente adecua.”

Davelaar ta bisa tocante insinerado, cu experto a studia y raporta cu esey ta e solucion mas duradero. E ta duna di conoce di su banda cu esey ta e miho decision y cu parlamento a compronde e necesidad di e ley y e ta “convenci cu lo vota pro e ley aki.”

“Pa e motibo aki a yega na e solucion. Aprobacion di e ley lo duna espacio pa nos mes haya fondo y espacio pa por inverti den mas solucion duradero. Pa comunidad cu ta biba cerca, e solucion ta un alivio mirando e preocupacion pa nan, cu tabata entre otro gas no saludabel; y mester duna atencion na esaki. E solucion ta beneficia cada ciudadano y nos como pais.”