10Aug KIA (1).JPG

Dialuna anochi un video a cuminsa circula riba internet caminda un persona a graba su mes mustrando con cerca e por yega di e muraya di KIA sin cu tin siguridad cu a hala su atencion of ningun tipo di reaccion mes. Sr. Rocco Tjon, Director di KIA ta splica Bon Dia cu no ta un sorpresa cu e heki rond di KIA no ta den bon condicion y cu ta haciendo un investigacion interno pa mira con e persona aki por a yega asina cerca di e muraya.

”Increibel, berdad na Aruba so por! Y despues nan ta puntra ta dicon tin tanto celular y droga etc. ta drenta KIA. Prioridadnan ta robes!” Asina ki un persona a reacciona na e video di Sr. Reinier Koole, kende a filma su mes yegando pafo cerca di e murayanan di KIA sin cu el a wordo detecta di siguridad. ”Ami no ta pompa cu politica, mi no ta interesa den esaki y mi no kier duna ningun hende un nomber malo tampoco esaki no ta mi intencion”, Sr. Koole ta bisa Bon Dia. Esaki no ta trata di Sr. Koole, kende tabata solamente hopi curioso pakico KIA ta mustra di ta un ”Ghost Town” manera e ta describie, sinembargo manera e ta splica Bon Dia, esaki ta refleha cu cualkier persona por drenta y benta arma of droga riba e tereno. Esaki ta algo cu basta hende tambe a comenta riba e video aki cu no por kere cu Sr. Koole por a yega asina cerca di KIA sin cu ningun hende por a ripara. 

No ta sorpresa cu e heki rond KIA no ta den miho estado
Sr. Tjon ta splica Bon Dia cu no ta sorpresa cu e heki rond ta den mal estado y nan ta haciendo un investigacion interno pa wak con e persona por a yega asina cerca di e murayanan, cual ta duidelijk pero tin cu wak si el a wordo mira si of no. ”Na mesun momento mi ta kere esey ta e parti di mas importante pasobra tur hende ta na altura di e heki, nos ta bezig cu diferente proyecto pa keda eleva e siguridad di KIA pa presonan y trahadonan, pasobra tur dos ta importante.” Sr. Tjon ta bisa. Den pasado, personal atento a logra di gara diferente hende na ocasionnan cu kier a  purba di tira pasa contrabanda. Sr. Tjon ta agrega cu e ta hopi orguyoso di e trabao di ekipo di siguridad anto cu esaki ta bay solamente sigui mehora cu tur e diferente proyectonan cu ta na caminda.

Ghost Town
Segun Sr. Reinier Koole, e ta bisa cu e tabata un ”Ghost Town”,  no tin censors of camara ni tampoco ningun borchi y por sigui menciona mas cos. ”Ningun hende no por yega asina cerca di un prizon. Mi por a tira kico cu ta eyden, arma , droga, cabuya etc. Mi a ripara con facil e ta pa cuminsa, con pa yega cu mi auto, pa di dos subi e barancanan, yen auto para eynan y mi por a kibra drenta den nan auto tambe. Na otro pais nan lo a tira mi of algo mi lo a wordo rementa pa un mina.” Sr. Koole ta  insisti cu e no ta haya esaki pret y e no a kibra ningun ley. E no a mira ningun borchi, e no a trece ningun contrabanda ni yuda ningun hende scapa for di KIA. Esaki sigur ta algo sumamente serio pa motibo cu Sr. Koole en berdad no ta djis ken cu ta tampoco, e ta un ex militar pues un persona cu ta entrena den campo di bataya. Con por ta cu un persona entrena por yega asina cerca di un prizon sin cu tin ningun notificacion ni accion di siguridad? Sr. Tjon no tabata tin ningun reaccion of opinion riba esaki fuera di e hecho cu ta haciendo e debido investigacion pa mira cua tabata e intencion tras di esaki pa locual pueblo mes ta comenta riba rednan social cu esaki tabata un ”wake up call.”